Daagal beeleedyo dad ay ku dhinteen oo ka dhacay tuulo ku taalla Ismaamulka Somakida Ethiopia

Dagaal ay ku dhinteen ugu yaraan 4 ruux ayna ku dhaawacmen tiro intaasi ka badan ayaa shalay ak dhacay tuulada Laba Baar ee xadka Itoobiya iyo Somaliya ku taalla.

Tuuladaasi ayaa ku hardamaya laba maleeshiyaad beeleedyo Somali ah kuwaasi oo la sheegayo in lagu guul dareyssat marar badan in nabadeyn la dhex dhigo isla markaana dagaalkoodu uu daba dheeraaday.

Warar halkaasi aanu ka heleyno ayaa sheegaya in dagaalka shalay uu ahaa mid aad u qaraar isla markaana hubka nuucyadiisa kala duwan la isu adeegsadayu sida uu kusoo waramayo Wariye Ibraahim Geedi lagu magacaabo oo ku sugan gobolka Hiiraan.

Dagaalka beelahaasi u dhexeeya ayaa odayaal u baxay in ay xaliyeen waxaa ay muteysteen xarig kadib markii ciidamada Itoobiyaanka ay ku eedeeyeen in ay amar la’aan iska soo galeen dhulka Ismaamulka Somalida Itoobiya.

Lama oga maalmaha soo socda sida xaal noqon doono hayeeshee warar soo baxaya ayaa sheegaya in wali dagaaladu ay socon karayaan maadaama aysan jirin cid ilaa iminka dhex dhexaadin ka wada labada dhinac.

Wasiir ku xigeenka Gaashaandhiga oo ka Hadley dilkii loo geystay Taliyaha Ciidamada Hodan

Feb-28-2007 

Salaad Cali Jeelle, wasiir ku xigeenka wasaarada warfaafinta dowlada federaalka kmg-ka Soomaaliyeed ayaa ka Hadley dilkii loo geystay Axmed xirsi Maxamed Dhaashane oo ka mid ahaa taliyeyaasha ciidamada Madaniga.

Salaad ayaa sheegay in ay aad uga xun yihiin dilka loo geystay Axmed Dhaashane, isaga oo sheegay in dowlada federaalka ay xiriir wada shaqeyneyd la leedahay ciidamada madaniga ee ku dhaqan xaafadaha.

Wuxuu sheegay in dowlada federaalka ay talaabo ka qaadi doonto kooxaha falalka dilka iyo weerarada ka geysanaya magaalada gudaheeda.

Axmed Xirsi Maxamed (Dhaashane) ayaa xalay la diley, kadib markii sida la sheegay rag hubeysan ay weerar ku soo qaadeen, iyaga oo dhowr xabadood la helay.

Waxaa soo baxaya warar sheegaya in horey dhowr jeer oo hore loogu hanjabay Dhaashane.

Aqoonyahanada, Dadka Waxgaradta iyo Saraakiisha oo isaga cararaya Magaalada Muqdisho

Feb-28-2007 

Caasimadda dalka Soomaaliya waxaa ka baxsanaya dadka waxgarta ee is dhihi karo tiir ayay u noqon karaan dhismaha iyo jiritaanka dalka, kuwaas oo bartimaameed ka dhiganayaan kooxaha wax dila ee fowdada ka wada Muqdisho.

Ugu yaraan 8 qof ayaa 12 saac aynu soo dhaafnay lagu dilay Caasimadda Soomaaliya Muqdisho, taasina waxay keentay in ay sii ballaarato cabsida laga qabo dhinaca Nabadgalyada.

Markii shalay sii laba jibaartay dilka loo geysanayo dadka rayidka ah ayaa dad badan oo aan la kulmay waxay bilaabayeen inay isaga tagaan dalka isla markaana meel ka mid ah dunida ka raadsanayaan goob ay ku noolaadan.

Qaar ka mid ah Aqoonyahanada degan Caasimadda Soomaaliya ayaa ku baxsaday lugta, iyadoo qaar kalena qorsheynayaan in ay u dhoofan Dibadda.

Sidoo kale Saraakiisha Ciidamada kala duwan Soomaaliya kuwa aysan shaqada ka helin Dowladda Federaalka ayaa iyagana waxay ka fikirayaan inay isaga tagaan Caasimadda Soomaaliya.

2-dii sano ugu dambeysay ayaa kooxo aan la fahmin waxaa ay yihiin waxay bartimaameed ka dhiganayeen Aqoonyahanada iyo Saraakiisha Soomaaliyed.

Haatan oo dalka Dowlad ka jirta ayaa mar kale dib loo bilaabay dilka Saraakiisha iyo Aqoonyanada iyo dadka waxgarta eek u dhaqan Magaalada Muqdisho.

Gacmo Dheere oo sheegay inay wada hadal kula jiraan kooxaha Dowlada kasoo horjeeda.

Feb-28-2007 

Wasiirka arrimaha gudaha Dowlada Federaalka Somalia Max’ed Maxamuud Guuleed “Gacmo Dheere” oo maanta shir jaraa’id ku qabtay hotelka Ambassador ee magaalada Muqdisho ayaa ka hadlay xaalada ammaan daro ee kusoo korortay dalka Somalia .

Gacmo Dheere ayaa sheegay inay Dowlada Federaalka aad ugu xuntahay dilalka kasoo cusboonaaday caasimada Somalia ee Muqdisho, isagoo sheegay inay arimahaadi Dowlada dhawaan wax weyn ay ka qaban doonto.

Wasiirka ayaa beeniyay inaysan jirin wararka sheegay in Dowlada Federaalka ay dooneyso inay xoog ku qabato gacan ku heynta guud ee caasimada Somalia Muqdisho, balse waxuu sheegay Dowlada inay tahay dowlad dib u heshiisiineed.

Gacmo Dheere ayaa ka hadlay qoysas aad u fara badan oo maalmihii ugu dambeeyay ka qaxayay magaalada Muqdisho, isagoo sheegay arintaasi inay ka dambeeyaan Saxaafada Muqdisho ka howl gasha oo buun buuniyay.

Dhinaca kale, Max’ed Gacmo Dheere ayaa tilmaamay inay Dowlada Federaalka wada hadal toos ah la gashay qaar kamid ah kooxaha kasoo horjeeda Dowlada, isla markaana ay u marayaan meel aad u wanaagsan.

Gacmo Dheere ayaa ugu dambeyntii sheegay in marka ay xaliyaan xiisad colaadeed ee ka dhex taagan Dowlada iyo Kooxaha kasoo horjeeda uu Saxaafada ugu warbixin doono.

Beesha Sadde ayaa cabasho ka dhan ah maamulka DF u magacowday gobalka Jubba Hoose u gudbisay Saraakiisha Ethiopian-ka.

Feb-28-2007 

Odoyaasha Beesha Jiroon ee ka soo jeeda Digil iyo Mirfile ayaa cabasho ka dhan ah maamulka cusub ee Dowlada Federaalka Somalia u magacowday gobolka Jubbada Hoose u gudbisay Saraakiisha ciidamada Ethiopian-ka.

Odoyaasha beesha Jiroon ayaa maalmihii ugu dambeeyay kulamo ku yeelanayay magaalada Kismaayo ee xarunta gobolka Jubbada Hoose iyagoo kaga hadlayay xaalada beesha murug ku haayay ee ku saabsanaa maamul u sameynta gobalka Jubbada Hoose.

Beesha ayaa si weyn waxa ay ugu tabaneysay qaabka ay Dowlada Federaalka u magacowday maamulka cusub ee goballka Jubbada Hoose gaar ahaan magaalada Kismaayo.

Cabdi Warsame Jiroon oo kamid ah Odoyaasha Beesha Joroon ayaa sheegay inay saraakiisha Ethiopia u gudbiyeen qorshe ay ugu andacoonayeen qaabka maamulka loo dhisay balse waxuu sheegay ilaa iminka inaysan jirin wax u suurta galay.

Ugu dambeyntii, Cabdi Warsame ayaa sheegay in qorshahii ay u gudbiyeen saraakiisha ciidamada Ethiopian-ka aysan jirin wax jawaab ah oo ilaa iminka ay saraakiisha beesha Jiroon u keenen.

Dhibaato soo foodsaartay qoysas ku guryo beelay dabkii ka kacay deg. Baardheere

Feb-28-2007 

Qoysas Fara badan oo dhowaan ku guryo beelay dabkii ka kacay degmada Baardheere ayaa waxaa soo foodsaaray dhibaatooyin adag oo dhinaca nolosha ah.

In ka badan 2000 kun oo qoys oo ku barakacay dabkii dhowaan ka kacay degmada Baardheere ayaa gargaar bani’aadnimo weydiistey hay’adaha samafalka iyo ururada deeqaha bixiya.

Qoysaskaan oo dulsaar ku ah haatan xaafado kale ayaa waxii agab iyo hanti ay lahaayeen waxa ay ku waayeen dabkaasi.

Qoysaskaan oo ka cabanaya hoy la’aan, cunno yari iyo caafimaad darro ayaanu jirin wali wax kaalmo la taaban karo ah oo la gaarsiiyay.

Qoysaskaan ayaa hadaanu helin gargaar deg deg ah ay dhici karto in ay soo wajahdo masiibo bani’aadnimo.

Hal qof oo ku geeriyooday iska horimaad ka dhacay Garoowe

Feb-28-2007 

Magaalada Garoowe ee xarunta Maamulka Puntland ayaa lagu soo waramayaa maanta in uu ka dhacay iska horimaad hubeysan oo sababay geerida hal qof, ka dib markii kooxo dabley ah ay weerareen xabsiga magaalada Garoowe, halkaasina ay kala baxeen 3 nin oo la sheegay in ay ku xukunaayeen dil toogasho ah.

Iska horimaadkaan oo dhex maray maleeshiyo beeleedyo iyo ciidamada daraawiishta Puntland ayaa waxaa la isku adeegsaday hubka fudud nuucyadiisa kala duwan, iyadoo iska horimaadkaasi uu yimid ka dib markii maleeshiyo beeleedyo ay weerar ku qaaday xabsiga Garoowe.

Kooxahani hubeysan ayaa waxa ay xabsiga kala baxeen 3 ruux oo lagu eedeeyay in ay fal dil ah u geysteen mid ka mid ah saraakiisha ciidamada Puntland, iyadoo Maxkamada Puntland ay ku xukuntay dil toogasho ah, taasina ay keentay in maleeshiyo ku hyeb ah eedeysanayaashaan ay soo weeraraan xabsiga.

Xaaladda Xabsiga ayaa haatan dagan, iyadoo aysan jirin wali wax war ah oo ka soo baxay Maamulka Puntland.

Ma ahan markii ugu horeysay oo weerar lagu qaado xabsi isla markaana lagala baxo dad ku xukuman dil toogasho ah.

Kala dhaca gaadiidka oo dib uga bilowday Muqdisho

Feb-28-2007 

Muddo laga joogo 9 bil ka dib ayaa magaalada Muqdisho waxaa ka bilowday kala dhaca gaadiidka BL ka ah, iyadoo maanta ilaa 5 baabuur lagu kala dhacay wadada wadnaha ee magaalada Muqdisho.

Kala dhaca gaadiidka BL ka ah ee isaga kala goosha Sanca iyo Suuqa Bakaaraha ayaa ka dambeeyay ka dib markii nin isagu sheegtay in laga dhacay gaari uu lahaa uu xareystay 4 gawaari oo ka mid ah caasiyada ka shaqeeya wadada wadnaha.

Max’ed Macalin Cadde oo ka mid ah darawalada Blka ah ee ka shaqeeya wadada wadnaha ayaa shabelle u sheegay in kala dhaca gaadiidka uu saameyn ku yeeshay isku socodkii gaadiidka iyo dadka ku socdaala wadadaasi.

Waxa uu sheegay in la xareeyay dhamaan waxii gaadiid ahaa ee ka howl-gali jirey wadadaasi, ka dib markii dadkii iska lahaa ay ka cabsadeen in la dhaco.

Waa markii ugu horreysay oo magaalada Muqdisho uu ka bilowdo kala dhaca gaadiidka muddo laga joogo 9 bilood, markaasi oo maxkamadihii islaamka ee ka arimin jirey Muqdisho ay meesha ka saareen kala dhaca gaadiidka.

Somalida ku dhaqan Nairobi oo baaq u jeediyay Midowga Africa

Feb-28-2007 

Somalida ku dhaqan magaalada Nairobi ee dalka Kenya ayaa ka codsaday Midowga Africa in ay soo dadajiyaan ciidamada Africa ee la keenayo Somalia si ay u badalaan kuwa Ethiopianka.

Dadka Somalida ah ee ku dhaqan xaafadaha magaalada Nairobi gaar ahaan Deegaanka Islii ayaa iyagoo ka walaacsan xaaladaha sii xumaanaya ee ka jira dalka Somalia waxa ay ka codsadeen Midowga Africa in uu dadajiyo ciidamadii uu geyn lahaa dalka Somalia si meesha ay uga saaraan xoogagga Ethiopianka .

Somalida degan magaalada Nairobi oo shabelle Microphone ka ay la dhex qaaday ayaa sidoo kale ka hadlay kumanaan qoysas ah oo ka barakacay caasimadda Somalia ee Muqdisho oo ay sheegeen in taasi ay sii xumeyneyso xaaladaha dhabta ah ee ka jira Somalia.

Midowga Africa oo wafdi ka socda uu haatan ku sugan yahay magaalada Muqdisho ayaa qorsheynaya in ciidamo uu si deg deg ah ugu soo diro dalka Somalia.

Ciidamada ugu horeeya ee ka socda Africa ayaa waxa ay ka imaanayaan dalka Uganda.

Siminnaar lagu baranayay anshaxa saxaafadda

Feb-28-2007 

Siminnaar lagu baranayay anshaxa saxaafadda ayaa manta lagu soo gabagabeeyay Hotelka Naasahablood ee Magalaada Muqdiosho, waxaan siminnaarkaas soo qabanqaabisay Hay’adda Warbaahinta bariga afrika ee EAMIS.

Siminnaarkaan oo loo qabtay 35-suxufi oo ka kala yimid gobollada dalka Soomaaliya iyo Muqdisho ayaa waxay ku baranayeen muddadii uu socday ee 5-ta casho ahayd anshax-wanaagga Saxaafadda.

 Madaxa Hay’adda EAMIS oo soo qabanqaabisay Siminnaarkaan socday mudda shanta maalmood ah C/qaadir Maxamuud Walaayo oo hadal ka jeediyay xiritaanka Siminnaarka ayaa sheegay in saxafiyiinta ka yimid gobollada dalka ay dhammaantood ka barteen siminnaarkaan anshaxa saxaafadda, sidaa daraadeedna looga baahan yahay inay ku shaqeeyaan anshax-wanaagga Saxaafadda. “Waxaan ka codsanayaa saxafi walba oo siminnaarkaan ka qaybgalay inuu ku shaqeeyo si dhexdhexaadnimo ah oo uusan wax gef ah u geysan shaqsi gaar ah, waxaana ku boorrinayaa inay howlaha ay qabanaayan ay ku saleeyaan anshaxa saxaafadda oo ay inta ka barteen” ayuu yiri C/qaadir Walaayo oo carrabka ku adkeeyay in loo baahan yahay in saxaafadda laga dhowro wax caadif ah. 

Mudane C/qaadir Walaayo wuxuu sheegay in saxaafadda ay tahay midda laga doonayo inay indho u noqoto shacabka Soomaaliyeed ee dhibaatada ku soo jiray sidii ay uga bixi lahaayeen, balse ma ahan inay noqdaan kuwo dhibaatooyin hor leh u sii abuura shacabka iyo dalka Soomaaliya oo soo maray xaalado kala duwan oo colaadeed.

“Ha ogaado saxafi walba, haddii carab dalable uu ku hadlo ma aqbali doono hadalkiisaan dalabka leh caqliga fiyow, sidoo kale qalinkaaga haddii uu yahay mid ay maal ka da’ayso dadku ma aqrisan doonaan, balse haddii uu noqdo mid uu ka da’ayo malabka shinnida qof walba waa uu malabsan doonaa” ayuu ka yiri gabagabadii siminnaarka C/qaadir Walaayo oo si weyn ugu dheeraaday sharciyada laga doonayo inuu saxafigu ku shaqeeyo.

 

Xafladda siminnaarka ayaa waxaa lagu soo bandhigay buug lagu ururiyay anshaxa saxaafadda oo ay ardayda siminnaarka ka qaybgalay wax ku kordhiyeen, waxaana la sheegay in ardayda shanta casho halkaas wax ku baranayay loo qabin doono si ay sahay uga dhigtaan.