Mareykanka oo sheegay in dowlad loo dhan yahay loo dhisayo Somalia

Mar/30/2007 

Xukuumadda Washington ayaa sheegtay in ay ku dadaaleyso sidii dalka Somalia loogu dhisi lahaa dowlad loo dhan yahay.

War kasoo baxay aqalka cad ee mareykanka ayaa lagu sheegay in mareykanku uu dhiirri galinayo sidii xasillooni looga dhalin lahaa dalka Somalia .

Mareykanka ayaa sheegay in si arrintaasi loo helo uu taageerayo in la soo dhiso xukuumad dhexe oo wax qabad leh oo ay ka qeyb qaataan guud ahaan dhinacyada siyaasadda ee ka jira dalka Soomaaliya.

Aqalka cad ee looga arrimiyo dalka mareykanka ayaa qoraalka mashruuc ku aaddan arrintan waxa uu u kala diray guddiyo dhowr ah oo kala raacsan labada gole ee odayaasha iyo wakiillada dalka Mareykanka .

Aqalka cad ayaa warbixintan ku sheegay inuu si adag u dhiirri galinayo wadahadal dhinaca siyaasadda ah oo looga gol leeyahay in lagu dhiso xukuumad midnimo qaran oo ay ka qeyb qaataan gabi ahaanba dhinacyada ku loolamaya siyaasadda dalka Soomaaliya.

Sidoo kale Mareykanku waxa uu sheegay in uu kaalmo siinayo dowladda ku meel gaarka Soomaaliya si loo dhameystiro howlaha ciidamada afrikaanka ee nabad ilaalinta ee la keenayo dalka Soomaaliya si xasillooni loogu soo dabbaalo dalka Soomaaliya.

Mareykanku waxa uu sheegay hadafkiisa dhinaca siyaasadda dibadda ee ku aaddan Soomaaliya uu yahay in laga takhalluso cagajugleynta dhinaca argagixisada ah ee kaga imanaysa dhinaca Somalia.

Dagaalka oo galay maalintii labaad ee Muqdisho oo sii kululaaday

Mar/30/2007 

Dagaalka oo galay maalintii labaad  magaalada Muqdisho ee u dhaxeeyay ciidamada Ethiopia iyo kooxaha ka soo horjeeda ayaa sii kululaaday, iyadoo 4 ruux oo rayid ah ay ku geeriyootay ka dib markii uu ka dul dhacay madfac agagaarka Xarunta Xisbiga guri ay daganaayeen sida ay shabelle u sheegeen dad goobjoogayaal ah.

Dadkaan geeriyooday oo isku qoys ka soo jeeda ayaaa waxa ay doonayeen in ay ka qaxaan halkaasi, oo ay u guuraan goob kale oo ka amaan badan, laakiin ma aysan u suurto galin oo madfac ayaa la dul habsaday.

Dadka dhintay ayaa la waayay qeybo ka mid ah jirkooda, hasa ahaatee dadkaasi mid ka mid ah ayaa la sheegay in gabi ahaanba la waayay, iyadoo goobtii ay fadhiday lagu arkay dhiig oo kaliya.

Dagaalkaan oo ahaa mid aad u qaraar galayna maalintii labaad ayaa galaaftay nolosha dad kor u dhaafaya 40 ruuxhalka dad ka badan 100 kalena la dhigay isbitaalada Muqdisho.

Madaafiic laga ridayo xarunta madaxtooyada ayaa ku dhaceeysay xaafadaha Towfiiq, Huriwaa suuq Bacaad iyo Xamar Bile, iyadoo dad badan oo rayid ah ay ku dhinteen oo qaarkood hilbahooda la waayay.

Dagaalkaan oo ah mid aad u culus ayaa la isku adeegsanayaa wali hubka waaweyn iyo waliba madaafiicda BM ka oo ay isticmaalayaan ciidamada Ethiopia.

Sidoo kale dagaalo qaraar ayaa waxa ay ka dhaceen wadada Xamar Bile ee agagaarka Saldhigga Wardhiigleey, iyadoo la isku adeegsaday hubka nuucyadiisa kala duwan, dagaalkaasi oo dhex maray ciidamada Ethiopia iyo kooxaha wax iska caabinta ayaan la ogeyn wali qasaarihiisa.

Inka badan 20 madfac ayaa inta la og yahay laga tuurey xarunta Madaxtooyada, iyadoona wali laga tuurayo, kuwaasi oo waxyeelo ba’an u geysatay dad rayid ah.

Ku dhowaad ilaa 30 ruux ayaa maanta la dhigay Isbitalka Madiina ee magaalada Muqdisho sida ay xaqiijiyeen saraakiisha caafimaadka ee Isbitalkaasi.

Dad aad u fara badan oo isugu jira haween iyo caruur ayaa lagu arakayaa wadooyinka magaalada Muqdisho, kuwaasi oo ku sii jeeda gobolada ku dhow dhow caasimadda.

Diyaarad Helicopter ah oo lagu soo riday Muqdisho

Mar/30/2007  Mid ka mid ah diyaaradaha qumaatiga u kaca ee ciidamada Ethiopia ayaa abaarihii 12:10 Pm lagu soo riday magaalada Muqdisho, ka dib markii lala helay gantaal raga riday dhulka , iyadoo dhinaca kale dagaalo qaraar ay ka soconayaan caasimadda Somalia.Sida ay Waajidpress u xaqiijiyeen goobjoogayaal, Waxaa la arkayay gantaalkaasi oo si toos ah u raacayay diyaaradda ka dibna uu ka haleelay qeybta dhexe ee diyaaradda. Diyaaradaan ayaa markii uu ku dhacay gantaalka waxa ay bilowday in olol fara badan uu ka kaco, waxaana Pilot kii waday uu isku dayay in uu ku dajiyo garoonka Muqdisho hasa ahaatee uma suurto galin oo diyaaradu waxa ay ku dhacday agagaarka godka qashinka ee Muuri ee degmada Madiina, halkaasi oo ay ku burburtey, ka dib markii sida ay sheegeen dad goobjoogayaal ah uu qarax weyn ka dhashay gantaalihii diyaaradaasi ay xambaarsaneyd. Diyaaradaan ayaa inta aan la soo ridin ka hor waxa ay dhowr gantaal ku riday goobaha ay isaga soo horjeedaan ciidamada Ethiopia iyo kooxaha ka soo horjeeda. Lama oga wali tirada rasmiga ah ee ciidamadii saarnaa diyaaraddaasi oo gabi ahaanba burburtey.

Seven Ethiopian soldiers were killed in heavy fighting on Thursday in the south of Mogadishu

Mar/29/2007

Mogadishu, Somalia (AFP) – Seven Ethiopian soldiers were killed in heavy fighting on Thursday in the south of Mogadishu, and two of their bodies were dragged through the streets, an AFP correspondent witnessed.

Dozens of men and women pulled the bodies of two soldiers in the street, shouting “We will kill the Ethiopian troops”, while five other bodies in Ethiopian uniforms lay on the ground in the southern district of Shirkole.

Nearby an Ethiopian military vehicle burned in the street.

Loudspeakers had earlier transmitted calls for residents to come out and fight the Ethiopian troops backing Somalia’s transitional government.

The latest deaths brought the toll in Thursday’s fighting to 22.

Meanwhile an AFP correspondent reported that a plane left Mogadishu airport carrying around a dozen wounded Ethiopian soldiers. The same plane had brought in around 60 soldiers on Thursday morning, he said.

Ethiopian helicopters earlier fired missiles on mainly southern Mogadishu as heavy fighting across the Somali capital left 15 people dead in an offensive against insurgent fighters.

The Ethiopians spearheaded the offensive, deploying tanks in neighbourhoods that have witnessed the most intense insurgent activity in recent months.

MUQDISHO: Dagaalladii Muqdisho ka billowday saakay oo ay ku dhinteen ugu yaraan 20-qof ayna ku dhaawacmeen tiro kale oo fara badan

Mar/29/2007 

Weli waxaa ka socda deegaanno ka tirsan Muqdsiho dagaallo aad u qaraar u dhexeeya kooxo ka soo horjeeda dowladda Federaalka iyo ciidammo isugu jira kuwa Dowladda Soomaaliya iyo Ethiopian. 

Dagaalkaan sababay dhimashada ugu yaraan 25-ruux inta la hubo, iyadoo sidoo kalena ay dhaawacyo ka soo gaareen dagaalkaas ku dhawaad 40-ruux sida ay u xaqiijiyeen Puntlandpost qaar ka mid ah Isbitaallada Muqdisho oo aan xiriir la sameynnay. 

Wararka ayaa waxay sheegayaan in dagaalladii ay weli ka socdaa deegaanno ay ka mid yihiin Isgoyska Towfiiq oo ay dagaallada si xowli leh uga socdaan, sidoo kalena waxaa dagaallo kale ka socdaan isgoyska Baar Ayaan, halkaasoo ah goobta ay sida weyn isaga horyimaadeen ciidammada Dowladda oo ay wehliyaan kuwa Ethiopia iyo sidoo kale kooxaha ka soo horjeeda. 

Goobjoogayaal ku sugan degmada Towfiiq ayaa waxay u sheegeen Puntlandpost in dagaalkii saakay dhacay uu ahaa mid aad u qaraar, waxaase ay u sheegeen dadkaas goobjoogayaasha ah Puntladpost in madaafiic waaweyn si weyn la isku weydaarsanayo. 

Dagaalka ayay sheegeen Goobjoogayaashaas in dagaalka uu marna qaboobayo marna xoogeysnayo, waxaaan ay dadkaas sheegeen in labada dhinac ay kala joogaan goobihii ay dagaalladu ka billowdeen. 

Dhanka kale, Madaafiic aad u xoog badan ayaa ku dhacayay agagaarka Warshadii hore ee Caanaha, Isgoyska Al-baraka, Dhismayaasha ku dhow, Isgoyska Black Sea, Baar Ubax iyo goobo kale, waxaana ku dhintay dad fara badan oo isugu jiray kuwo guryahooda ku sugnaa iyo kuwo ku suganaa Waddooyinka iyo goobaha ay ku dhacayeen.

Diyaarado Helicopters ah oo duqeeyay Xaafado ka mid ah Magaalada Muqdisho

Khamiis, March 29, 2007(Waajid press): Diyaarado Helicopters ah oo joog hoose ku socda ayaa duqeeyay xaafado ka mid ah magaalada Muqdisho, iyadoo duqeyntaasna ay waxyeello ka soo gaartay dad rayid ah oo guryahooda iska joogay. 

Diyaaradahan oo aan la ogeyn in ay yihiin kuwii ay adeegsanayeen Ciidamada Midowga Afrika iyo in ay yihiin kuwo ay leeyihiin Ciidamada Itoobiya ayaa markii ay duqeynta bilaabeen waxay si weyn u qal qal geliyeen dad ku sugan xaafado ka mid ah Degmooyinka Hodan iyo Howl-wadaag, kuwaasi oo ay agagaarahooda ku soo dhaceen madaafiic ay soo ganeen diyaaradahaas. 

Ilaa iyo haatan si rasmi ah looma xaqiijin karo khasaaraha ay geysteen madaafiicda ay rideen diyaaradahaas, waxaase la hubaa in halkii ay ku dhaceen oo magaalada dhexdeeda ah ay dad ku sugnaayeen. 

Duqeynta diyaaradahan ayaa waxay ku soo beegmeysaa iyadoo saakay aroortii ay Ciidamo badan oo Itoobiyaan ah ay gudaha u galeen xaafado ka mid ah Degmooyinka Gobolka Banaadir, iyagoo la wareegay Isgoysyo ay horay ugu sugnaan jireen Kooxaha ka soo horjeeda Ciidamada Dowladda Federaalka iyo kuwa Itoobiyaanka. 

Wasiirka Arrimaha Gudaha Xukuumadda Federaalka Soomaaliya Maxamed Maxamuud Guuleed Gacma-Dheere oo ka hadlay Taangiyada Itoobiyaanka ee gudaha u galay Magaalada Muqdisho iyo diyaaradaha lagu soo kiciyay ayaa wuxuu sheegay in Ciidamada Itoobiyaanka ay yihiin kuwo gacan siinaya Dowladda Federaalka, isla markaana la dagaalamaya kooxo nabadda diidan oo Dowladda ka soo horjeeda. 

Si kastaba arrintu ha ahaatee, Diyaaradahan Helicopters-ka ah ee duqeynta geystay ayaa waxay dadka Muqdisho dib u soo xusuusiyeen xiligii ay Magaalada Muqdisho ka howlgelayeen Ciidamadii US/UNOSOM oo adeegsanayay Diyaarado Helicopters ah iyo Taangiyo, inkastoo Ciidamadaas ay maaro u waayeen Xooggagii ka amar qaadanayay Jen. Caydiid ee ay dagaalka iskala soo horjeedeen.

Sheekh Shariif Sheekh Axmed “Dhawaan dhaq dhaqaaq ayaan bilaabi doonaa…”

Mar/28 

Gudoomiyaha Maxkamadihii laga itaalka roonaaday Sheekh Shariif Sheekh Axmed ayaa shaaca ka qaaday in dagaalka ka socda Muqdisho ay dhinacooda joogaan guul, islamarkaana uu xilka xoreynta dalka uu saran yahay jiilka hada Muqdisho joogo.

Sheekh Shariif oo qudbad dheer qadka isgaarsiinta kaga jeediyay shir ka socday magaalada Stockholm ee dalka Sweden  ka dhacay ayna soo qaban qaabiyeen Jaaliyada Soomaaliyeed ee ku dhaqan dalka Sweden ayaa sheegay in Madaxdii maxkamadaha islaamiga ah ee kal jooga gudaha iyo dibada ay isla xiriiraan howshuna ay socoto.

“Soomaaliya isku meel uma wada jeedan isku fekana ma ahayn, lakiin maanta  Soomaali 95% waxaa la dhih karaa isku meel ayey u jeedaa waana Nicmo” ayuu yiri Sheekh Shariif oo Alle ka baryay   in uu ummadda quluutooda isku soo duwo.

Sheekh Shariif waxa kale oo uu ka hadlay xaalada manta uu dalku ku jiro wuxuuna yiri “Dhamaanteen waa inuu hadafkeenu noqdaa inaynu umadaas xurowdo, inay nabad ku noolaato,inay Ilaaheyda raali geliso awooda kasta oo Bani’aadamku sheegtaa tan Ilaah ayaa ka awood badan” ayuu yiri Gudoomiyaha maxkamadaha oo sheegay inay sii fududaaneyso qadiyada.

 “laba maalin dabeysha isku mid maaha , maantaan Xamar ka soo baxnay iyo manta wax badan ayaa is badlay, hadii aan dadaalno waa isasii badalayaan, marka ducada iyo dadaalka aan badino taas ayaa laga ma maarmaan ah” ayuu mar kale yiri Sheekh Shariif oo sii daba dhigay inay dhawaan bilaabi doonaan dhaq dhaqaaq siyaasadeed oo dhinaca dibada ah.

Maleeshiyooyin Reer Ceelwaaq ah oo tababar loogu soo direy Baydhabo

Mar/28/2007 

Qaar ka mid ah maleeshiyooyinkii ku sugnaa degmada Ceelwaaq ee gobolkaasi ayaa tababar loogu qaaday magaalada Baydhabo ee xarunta gobolka Baay.

Ku dhowaad 30 maleeshiyo ah oo ku hubeysan nuucyada qoryaha fudud kana yimid dhinaca magaalada Ceelwaaq ayaa xalay ka ambabaxay degmada Baardheere, kuwaasi oo ku sii jeeda dugsi tababar oo ku yaala magaalada Baardheere, waxaana Maleeshiyadaan hogaaminaya taliyaha booliska degmada Ceelwaaq Max’ed Cumar Tuurre.

Tuurre oo shabelle u waramay ayaa ku tilmaamay talaabadaan ay qaadeen mid dowladda KMG ah ay kaga dalbatay in la soo xareeyo maleeshiyooyin si loo siiyo tababar, isagoo tilmaamay marka maleeshiyadaan ay dhameystaan tababarka ay ka mid noqon doonaan ciidamada booliska Somalia.

Waxa uu sheegay in Maleeshiyadaan ay ka mid ahaayeen ciidamo sugi jirey amaanka degmada Ceelwaaq.

Ma ahan markii ugu horreysay oo maleeshiyo ka soo jeeda degmada Ceelwaaq ay soo gaarto magaalada Baydhabo.

Eritrea iyo Midowga Yurub oo ka wada hadlay arimaha Somalia

Madaxweynaha dalka Eritrea oo shalay kulan la qaatay wafdi ka socda Midowga Yurub ayaa sheegay in ciidamo shisheeye aaneey nabad ka dhalin kareyn Somalia.

Kulankaan ayaa waxa uu Madaxweyne Isias kula soo qaaday ergada midowga Yurub arimaha Somalia sidii xal dhab ah loogu heli lahaa mashaakilaadka haatan ka taagan dalka Somalia.

Waxa uu sheegay in nabadda Somalia lagu heli karo, iyadoo la xoojinayo midnimada Somalia is faham kala dhexe mara qeybaha kala duwan ee isaga soo horjeeda arimaha SOmalia.

Madaxweynaha Eritrea waxa uu xusay in dowladda Somalia aysan sii shaqeyn karin hadii aysan heysan taageerada shacabka Somaliyeed, waxaana uu tilmaamay in fahamka Eritrea uu yahay in nabad iyo xasilooni aysan ku soo celin karin Somalia ciidamo shisheeye.

Waxaa kale uu sheegay in hadii la doonayo nabad lagu soo celiyo Somalia ay haboon tahay in la helo hanaan siyaasadeed oo raali ay ka wada yihiin dhamaan qeybaha isaga soo horjeeda Somalia, waxaana uu ku taliyay in la soo afjaro fara galinta shisheeye ee arimaha Somalia.

Waxaa kale uu sheegay in midowga Yurub iyo ciidamada kale ee nabad ilaalinta ay wax ka tari karaan marka la helo heshiis siyaasadeed oo loo mideysan yahay, waxaana uu sharaxaada dheeri ah ka bixiyay xaaladda Somalia.

Danjire Michel Koler oo hogaaminayay wafuuda Midowga Yurub ayaa waxa uu sheegay in Midowga Yurub uu diyaar u yahay in Eritrea uu kala shaqeeyo arimaha Somalia,

Waxaa kale uu sheegay in midowga Yurub uu xoogga saarayo dadaalada lagu hormarinayo wada hadalka siyaasadeed ee Somalida.

Seddex Nin oo uu ku jiray C/naasir Seerjito oo Muqdisho lagu dilay

Arbaco, March 28, 2007(Waajid.wordpress.com): Seddex nin oo uu ku jiray C/naasir Axmed Aadan Seerjito ayaa maanta lagu dilay xaafadda Taleex ee magaalada Muqdisho, iyadoo dilkoodana ay ka dambeeyeen kooxo hubeysan oo gaari watay. 

Lama yaqaano sababta loo dilay C/naasir Seerjito iyo labada nin ee kale ee la socotay, hayeeshee waxay dad ka dhawaa halkii lagu dilay ay sheegeen in ay dileen rag gaari watay oo kor ka ilaaleysanayay. 

Marxuum C/naasir Seertijo oo ka mid ahaa Ciidamadii Dowladdii hore, kadib wixii ka dambeeyay burburkii Dowladdii hore waxaa uu noqday Xoghayihii Difaaca USC, garabkii Jen. Caydiid, xiligii Dowladdii Cartana wuxuu ahaa Qunsulka Soomaaliya ee Imaaraadka Carabta. 

Wuxuu ku dhashay Magaalada Beledweyne ee Gobolka Hiiraan sanadkii 1960-kii, wuxuuna ku soo barbaaray halkaas oo uu waxbarashadiisii aas-aasiga ahayd ku soo qaatay. 

Sida ay sheegeen eheladiisa wuxuu marxuumka dhawaan ka soo bogsooday dhaawac loogu geystay agagaarka Folorenza ee Degmada Wardhiigley, kadib markii ay weerareen kooxo hubeysan oo doonayay in ay dilaan. 

Guddoomiyaha Hay’adda Nabadda iyo Xuquuqda Aadanaha Elman Inj. Sudaan Cali Axmed ayaa cambaareeyay dilka loo geystay marxuumiintaas, wuxuuna sheegay in dilka loo geystay uu qeyb ka yahay dilal abaabulan oo maalmahan ka dhacayay magaalada Muqdisho, isago caddeeyay in dilkaas uu ahaa mid ka dhan ah Diinta Islaamka, Xuquuqda Aadanha, Xeerarka Soomaalida iyo Baaqa Caalamiga ee la isla aqoonsan yahay oo dhigaya xoriyadda uu qof walba oo Bani’aadam ah u leeyahay in uu noolaado.