Dagaalo goos goos ah oo ka soconaya caasimadda Somalia

20 Apr 07 

Dagaalo goos goos ah ayaa ka dhacaya maanta qeybo ka mid ah magaalada Muqdisho, gaar ahaan goobihii shalay lagu dagaalamay,iyadoo madaafiic aad u culus oo uu ka mid yahay qoriga BM ka ah lagu duqeynayo qeybo ka mid ah caasimadda, kaasi oo ay adeegsanayaan ciidamada Ethiopia ee fariisinka ku leh xarunta Villa Somalia.

Ilaa iyo haatan lama oga qasaaraha dhabta ah ee dagaaladaan saakay mar kale ka bilowday aagagga ay ciidamada isku horfadhiyaan gaar ahaan deegaanada Fagax, Jamhuuriya iyo Jungale, iyadoo la maqlayo haatan rasaas xoogan oo ka dhaceysa hubka nuucyadiisa kala duwan sida uu shabelle qadka teleefoonka ugu sheegay Goobjooge ku sugan deegaanka Fagax.

Daryanka madaafiicda BM ka ah iyo kuwo kale ee ka dhaca taankiyada ayaa si weyn u gil gilay saacadihii la soo dhaafay xaafado ka mid ah caasimadda.

Madaafiicdaan oo intooda badan ay ciidamada Ethiopia ka tuurayeen xarunta Villa Somalia ayaa ilaa iyo haatan la helin wax qasaaro ah oo ka dhashay, inkastoo goobaha caafimaadka ay ku warameen dad qaba dhaawacyo kala duwan oo la geeyay xarumahaasi.

Isbitalka Madiina ayaa saacadihii la soo dhaafay waxaa la geeyay ilaa 7 ruux oo ku dhaawacmay dagaalada haatan ka soconaya caasimadda, iyadoo isbitalkaasi ay horey u yaaleen ilaa 81 ruux oo la dhigay Isbitalka labadii maalmood ee la soo dhaafay.

Si kastaba ha ahaatee xaaladda Guud ee magaalada Muqdisho ayaa maanta ka yara dagan marka loo eego maalintii shalay oo ay ka dhaceen dagaalo galaaftay nolosha in ka badan 20 ruux halka tiro ka badan 100 kalena ay ku dhaawacmeen.

Baydhabo: Baydhabo oo hubka laga mamnuucay

19 Apr 07 

Baydhabo-Gobolka  Baydhabo ayaa waxaa lagu soo rogay go’aamo hubka looga mamnuucayo in lagu dhexqaato.

Go’aankan ayaa waxaa soo saaray maamulka gobolka iyo taliska ciidanka gobolka Baay, oo sheegay inay tallaabo ka qaadi doon ciddii hub lagu arko.

Taliyaha saldhigga booliska Baydhabo Axmed Aadan Biid ayaa sheegay in hawl gallkan uu qayb ka yahay sugidda ammaanka magaalada Baydhabo.

Taliyuhu wuxuu sheegay in xaaladda ammaanka ay tahay mid aad u heer saraysa, hase ahaatee la doonayo in lasii xoojiyo .

Hay’adaha ayaa lagu wargaliyay inay isi soo diiwaan galiyaan, si loo ogaado hubka lagu ilaaliyo .

Dadka waxaa loo sheegay inaysan hubka ku wadan karin magaalada gudeheeda, waxaana lagu arkayaa magaalada ciidamo boolis ah kuwaasoo loo kala qaybiyay xaafadaha Baydhabo.

Ciidamada Booliska magaalada Baydhabo oo xalay Bandow kusoo rogay magaalada

19 Apr 07 

Ciidamada Booliska magaalada Baydhabo ee gobolka Bay ayaa xalay bandow kusoo rogay magaalada Baydhabo kadib markii ay mudooyinkii ugu danbeeyey halkaasi kusoo cusboonaadeen falal ammaan daro oo kii ugu danbeeyey uu ahaa mid lagu weeraray mas’uuliyiin katirsan Ciidamada Booliska.

Maamulka gobolka Bay ayaa xalay Bandow ku soo rogay magaalada Baydhabo si loo adkeeyo amaanka guud ee Magaalada Baydhabo
Ciidamada dowladda fadaraalka KMG ah ee Soomaaliya ayaa xalay bilaabay in ay gaaf wareegaan gudaha xaafadaha kala duwan ee magaalada Baydhabo.3

Taliyaha saldhigga degmada Baydhabo Dhame Aadan Axmed Cumar oo howl-galkaasi ka dib war siiyey HornAfrik ayaa sheegay in ujeedada howl-galkaan ay tahay sugidda amaanka magaalada iyo fulinta go’aanka maamulka oo ah in la mamnuuco qaadashada hubka sharci darada ah ee kajira gudaha magaalada.

Waxa uu sheegay in howl-galkaan aanu ku ekeyn Magaalada Baydhabo isla markaana uu ka bilowday dhamaan degmooyinka kale ee katirsan gobolka Bay.

Waxaana uu u ugu baaqay hay’adaha samafalka in ay soo diwaan galiyaan hubka lagu ilaaliyo.si markaasi dhaqdhaqaaqa qaadasha hubka ay u noqoto mid xadidan.

Weerar uu fuliyay ruux naftiis hure ah oo lagu qaaday ciidamada Ethiopia ee fariisinka ku leh xaruntii hore ee Asluubta.

19 Apr 07 

Muqdisho:-Qarax xoogan ayaa lagu soo warramayaa in uu ka dhacay xaruntii hore ee ciidamada Asluubta oo fariisin u ah ciidamada Ethiopia, waxaana la sheegaya in qaraxa uu ahaa mid uu fuliyay ruux naftis hure ah.
Waa weerarkii 2aad oo maalin gudaheed lagu qaado ciidamada Ethiopia ayadoo maanta weerar loo adeegsaday miino lagu aasay wadada dacalkeeda lagu qarxiyay kolonyo ciidamada Ethiopia ay leeyihiin.
Warar lagu kalsoon yahay ayaa sheegaya in ruux naftii hure ah oo kaxeysanayay gaari miineysan uu isku qarxiyay fariisinka ciidamada Ethiopia ay ku leeyihiin xarunti hore ee asluubta.
Lama garanayo khasaaraha ka soo gaaray qaraxaasi,hayeeshee waxaa lagu soo warramayaa in dhawr gaari ay gubatay tiro askar ahna ay soo gaartay waxyeello isugu jirta dhimasho iyo dhaawac.
Ma jirto cid sheegatay masuuliyada weerarkan istishhaadiga ah oo noqonaya kii 2aad oo ceynkiisa oo ka dhaca magaalada Muqdisho,bishii hore ayay ahayd markii ruux naftiis hure ah uu isku qarxiyay fariisin ciidamada Ethiopia ay ku lahaayeen deegaanka Ceelcirfiid.

Dagaalo xoogan oo ka soconaya Wadada Fagax ee Muqdisho

19 Apr 07 

Dagaalo xoogan oo la isku adeegsanayo nuucyada kala duwan ee hubka fudud iyo kan culus iyo madaafiic lagu tuurayo goobaha rayidka ay dagan yihiin ayaa barqo nimadii maanta ka qarxay caasimadda Somalia ee Muqdisho.

Dagaalkaan oo ka qarxay isgoyska Fagax iyo deegaanada ku hareersan ayaa saameyn xoog leh ku yeeshay degmooyinka yaaqshiid iyo Huriwaa, iyadoo tobanaan madfac ay ku dhaceen xaafado ka baxsan halka lagu dagaalamayo.

Lama oga sababta dagaalkaan uu u qarxay hasa ahaatee wararka qaar ayaa sheegaya in ciidamo Ethiopian ah oo wata Taankiyo iyo gawaari kale lagu biiriyay ciidamadii dowlada ee horey halkaasi kula dagaalamayay xoogagga diidan joogitaanka ciidamada Ethiopia ee gudaha Somalia inkastoo wali aan la soo sheegin qasaaraha dagaaladaasi ka dhashay hadana waxaa iska cad in madaafiicda goobaha rayidka ugu dhacaya si aan loo meel dayin ay sababeen qasaaro nafeed.

Iska horimaadyadaan ayaa waxaa barbar socda madaafiic laga soo tuurayo wasaaradii hore ee G/dhigga, Kulyadda Jaalle Siyaad iyo xarunta Madaxtooyada.