Archive for May, 2009

Kororso Aqoontaada Su’aalo iyo Jawaabo oo Diini ah iyo Aqoon Guud.

May 29, 2009

Kororso Aqoontaada Barnaamij Diini ah iyo Aqoon guud: Waa barnaamijkii aad inooga barateen jimco walbo. Wuxuuna xanbaarsan yahay macluumaad fara-badan ee bal kaalay oo inala faa’iideyso.
1-Su’aal Sheeg Asxaabigii dhashay aabihiis oo 12 jir ah?
1-Jawab: Wuxu ahaa C/laahi Bin Cumar Bin Caas Rc.

2-Su’aal Sheeg todobadii Asxaabi ee axaadiista ugu badan ka wariyeen Rasuul-ka (NNKH)?
2-Jawab: Waxay kala yihiin 1-Abuu hureyra Rc, 2-Caa’isha Bintu Abii-bakar Rc, 3-C/laahi Bin Cabaas. 4-C/laahi Bin Cumar, 5-Jaabir Bin C/laahi, 6-Aanis Bin Maalik, 7-Sacad Bin Malik,

3-Su’aal Sheeg Dhaqtaradii ugu horeysay ee Islam-ka?
3-Jawab: Waa Rufeydah Bintu Sacad.

4-Su’aal Sheeg imisa jeer ayuu Nebiga (NNKH) Cumreestay?
4-Jawab: Wuxu Cumreestay 4 Jeer.

5-Su’aal Sheeg xiligii la-aas aasay Magalaada Kuufa?
5-Jawab: Jawab waxa la-aas aasay xiligii Cumar Bin Khadaab Rc.

6-Su’aal Sheeg yaa aas-aasay Magalaada Kuufa?
6-Jawab: Waxaa aas-aasay Sacad Bin Abii Waqaas.

7-Su’aal Sheeg goorma ayuu dhacay dagaalkii Qaadisiya?
7-Jawab: Wuxu dhacay Sanadkii 14- aad ee Hijriyada.

8-Su’aal Sheeg sanadkii soomaaliya lagu qabtay shirkii Midowga Afrika?
8-Jawab: Waxa lagu qabtay sanadkii 1971-dii

9-Su’aal Sheeg dalalkii ku buuxiyey Xisaabta Eber (0) ?
9-Jawab: Waa Masar iyo Mesopotomia.

10-Su’aal Sheeg xagee bey u martaa cuntada cunuga marka uu ku jiro caloosha hooyadiis?
10-Jawab: Waxay u martaa Xudunta.

11-Su’aal Sheeg maxaa loo-yaqaanaa cudurka ay siddo kaneecada mideeda dhidig?
11-Jawab: Waxaa loo-yaqaanaa Malaariya.

12-Su’aal Sheeg Muruqa ugu xoogga badan jirka Bili’aadam-ka?

13-Su’aal Sheeg waa maxay Xubinta ugu lafaha yar jirka Bili’aadam-ka?
13-Jawab: Waa Dhegta.

14-Su’aal Sheeg wadanka ugu dadka yar. Wadama leesku yiraahdo Igad?

Dhex-taal Gaaban.

Haddii aan dib idin xusuusino 6-dii su’aaladood ee aan idin weydiinay jimcihii la-soo dhaafay

Waxay kala ahaayeen”

1-Su’aal Sheeg asxaabtii uu Rasuulka (NNKH) u doortay inay Qur’aanka soo dagaya uruuriyaan?

2-Su’aal Sheeg ninkii ugu horeeyey ee Qur’aanka uruuriya?

3-Su’aal Sheeg kumuu ahaa asxaabigii uu abuu-bakar u xil saaray ama madax uga dhigay asxaabtii soo ururineesay quraanka?

4-Su’aal sheeg Magaca Buurta Afrika ugu dheer?

5-Su’aal Sheeg Wax marka ay siyaadaan sii naaqusa?

Jawaabaha waxay kala yihiin”

1-Jawab: Wuxu u doortay Sayid Bin Thaabid, Ubaya Bin Kacab, Mucaad Bin Jabal, Mucaawiye Bin Abuu Sufyaan, iyo Afartii Khaliif.

2-Jawab: Waa Abuu-Bakar Sadiiq Rc.
3- Jawab: Zayd Binu Thaabit Rc.
4-Jawab: Waa Kalaminjaaro.
5-Jawab: Waa Dayaxa.

Ugu danbeen waxaa u maahad celineenaa dadkii ka soo wada jawaabay iyo kuwii jawaabaha qaar ka soo saxay. Iyo kuwii isku dayey iney ka soo jawaabaan balse aanan haleelin jawaabaha. Dadkaasi waxaanu lee-nahay maanta haddii aad qaladeen Insha’allah beri ayaad sixi doontaan.

War Deg Deg ah: Sarkaal Muqaawamo ah oo dhawaan ka soo tagay dowladda KMG oo goor dhow Lagu toogtay gudaha Suuqa Bakaaraha ee Magaalada Muqdisho.

May 29, 2009

Sarkaal sare oo ka tirsanaa xoogaga Muqaawamo ah oo dhawaan ka soo tagay dowladda KMG ayaa Caawa lagu toogtay gudaha Suuqa Bakaaraha ee Magaalada Muqdisho.

C/qaadir Xamza Abuu Qataatoow oo ah sarkaal sare oo ka tirsanaa xoogaga muqaawamada islamarkaana dhawaan Ururka Xisbul Islaamka ku soo biiray kana soo tagay dowladda KMG Soomaaliya ayaa kooxo hubaysan waxa ay ku dileen gudaha Suuq Bakaaraha gaar ahaan Agagaasrka Isgoyska Black Sea ee Magaalada Muqdisho.

Dilka sarkaalkani ayaa waxaa Caawa Idaacada Waajidpress u xaqiijiyay saraakiil sar sare oo ka mid ah Ururka Xisbul Islaam oo uu ka tirsanaa,waxaana ay intaasi raaciyeen in aan la garanayn Sababtay loo dilay iyo Cida dishay Intaba.

Kooxaha dilka u geystay oo ilaa iyo hadda aan la aqoon cidda ay yihiin ayaa markii ay dilka u geysteen sarkalkaasi waxaa ay ka baxsadeen goobtii ay falkaasi ka geysteen.

C/qaadir Xamza Qataatoow waxaa uu ka mid ah saraakiishii Muqaawamada xiliyada adag dagaalada kula jiray Ciidamada dowladda KMG iyo kuwa Ethiopia,waxaana markii dambe uu ku biiray dhanka dowladda kadib markii la soo doortay madaxweyne Sheekh Shariif Sheekh Axmed iyadoo Isbuucaan horaantiisana uu ka soo tagay dowladda islamarkaana uu ku biiray Ururka Xisbul Islaam.

Ahlu Sunah Waljamaacah oo Salaadii Jimcaha uga hadlay inaan Kitaabka Alle laga been sheegin oo aan la iclaamin Jihaad

May 29, 2009

Culumaa’udiinka Ahlu Sunah Waljamaacah ayaa maanta salaadii Jimcaha kadib uga hadlay in aan laga been sheegin Kitaab oo aan la iclaamin Jihaad lagu marin habaabinayo dhalinyarada.

Culumaa’udiinka ayaa si kulul u sheegay in Wadanka Soomaaliya uusan ka jirin wax Jihaad ah, isla markaana Umadaa Soomaaliyed ay tahay 100%, iyagoona Umadda Soomaaliya u sheegay inay ka digtoonaadaan waxyaabaha ka socda dalka oo ay fiiro gaar ah u yeeshaan.

Waxay kaloo Culimada ka hadleen in dadka ka been sheegaya Diinta Islaamka ay Alle agtiisa Cadaab ku leeyihiin , carada Allena ay ku dhaceyso, waxayna ugu baaqeen inay ka towbad keenaan, Allena u noqdaan .

Sidoo kale Culumaa’udiinka Ahlu Sunah Waljamaacah ayaa u jeediyay kooxaha ka been sheegaya Diinta Islaamka ay Alle dimbi dhaaf weydiistaan, , Umadana ka joogaan waxa ay ugu yeereen fasaahada ay ku hayaan sida ay hadalka u dhigeen.

Culumaa’udiinka ayaa wax qalad ku tilmaamay in dhalinyarada loo adeegsado bur burinta dalka iyo inay geystaan dilka macna darada, waxaana ay sheegeen in Diinta Islaamka aanay qabin in qof muslim ah la isku qarxiyo, iyagoona tilmaamay in had iyo jeer dhalinyarada loo adeegsado in lagu fushado dano gaar ah, iyadoo loo marayo hab aan diinta waafaqsaneyn oo niyada iyo qalbigana laga xadayo, lana marin habaabinayo sida ay hadalka u dhigeen.

Ciidamada dowladda KMG Soomaaliya oo maanta degmada Dharkeenlay ee Gobolka Banaadir ku toogtay Sedax qofood oo Dhalinyaro ah.

May 29, 2009

Ciidamo ka tirsan dowladda KMG Soomaaliya ayaa maanta 3-dhalinyaro ah ku toogtay Agagaarka Xaafadda Macmacaanka degmada Dharkeenay ee Gobolka Banaadir.

Ciidamadaani ka tirsan dowladda KMG Soomaa ayaa la sheegay in maanta 11-kii barqanimo si bareer ah ay u dileen sedax dhalinyaro kuwaasi oo ay ku dileen gudaha Degmada Dharkeenlay ee gobolka Banaadir sida Idaacada Shabelle ay u sheegeen qaar ka mid ah dadka deegaanka.

Ciidamada ayaa waxaa ay wararku sheegayaan in qaar ka mid ah dhalinyaraday dileen ay ka kaxeeysteen xaafadahooda oo ku yaala xaafadda Macmacaanka ee degmada Dharkeenlay,waxaana maydadka sedaxda ruux ee ay dileen ciidamada dowkadda in mudo ah ay yaaleen goobtii ay falka dilka ah ugu geysteen iyadoo askartu ay diideen in la qaado meydka dadkaasi.

Meydka mid ka mid ah dhalinyaradii ay dileen maanta ciidamada dowladda oo la sheegay in ay soo doonatay hooyadii dhashay ayaa la sheegay in ay u diideen ciidamada dowladda kMG Soomaaliya sida uu Shabelle u sheegay mid ka mid ah dadka deeganka.

Lama oga ujeedada rasmi ahaan ciidamada dowlada KMG Soomaaliya ay u dileen dhalinyaradaasi oo la sheegay in aanay lagu Aqoon ku lug yeelashada siyaadaha is diidan ee ka jira Muqdisho,waxaana ay ahaayeen dhalinyaro reer deegaan ah.

Dowladda KMG Soomaaliya oo ganacsatada Soomaaliyeed uga digtay isticmaalka Garoomada iyo dekadaha ay sheegtay dowladda KMG in ay xiranyihiin.

May 29, 2009

Dowladda KMG Soomaaliya aya uga digtay ganacsatada Soomaaliyeed isticmaalka dekadaha iyo Garoomadii dhawaan la xanibay ee gacanta ay ku ahayaan xoogaga dowladda ka horjeeda.

Wasiirka Gaadiidka Badda iyo dekadaha Max’ed Ibraahim Xaabsade oo maanta shir jaraa’id ku qabtay Magaalada Muqdisho ayaa ugu digay ganacsatada in alaabo ay kala soo dagaan dekadaha iyo Garoomada ay dhawaan sheegtay dowladda KMG Soomaaliya in ay xiranyihiin kuwaasi oo gacanta ugu jira kooxaha ka soo horjeeda dowladda KMG Soomaaliya.

Waxaa uu sheegay Xaabsade Ganacsatada ilaa hadda markii uu go’aankaasi soo baxay Alaabada ka soo dajiyay dekadaha iyo garoomadaasi hadii aanay ka waantoobin ay dhibaato soo gaari doonto sida uu hadalka u dhigay,waxaana uu sheegay in dhibaatadaasi ay u geysan doonaan maraakiib iyo diyaarado ku sugan badda dhexdooda oo laga leeyahay wadamada Caalamka.

Sidoo kale wasiirka Gaadiidka Badda iyo dekadaha Max’ed Ibraahim Xaabsade ayaa waxaa uu sheegay in markab ku sii jeeday dekadda Magaalada Kismaayo diyaarado iyo maraakiib badda ku sugan ay qabteen islamarkaana ay dib u soo celiyeen,waxaana uu sheegay ganacsatada in arintaasi oo kale ay qabsan doonto hadii aanay ka waantoobin howlaha ay wadaan.

Si kastaba ha ahaatee dhawaan ayey aheeyd markii golaha Wasiirada Xukuumadda dowladda KMG Soomaaliya kulan magaalada Muqdisho ay ku yeesheen ay ku ansixiyeen in ay xiranyihiin dhamaan dekadaha iyo garoomada gacanta ugu jira kooxaha dowladda ka soo horjeeda iyadoo ilaa iyo haatana aanay jirin garoomada iyo dekadahaasi wax iska badalay howlahoodii caadiga ahaa.

Maamulkii hore ee Gobolka Hiiraan oo sheegay inuu si nabad ugu soo laabanayo Magaalada B/weyn.

May 29, 2009

Maamulkii hore Gobolka Hiiraan ee Dowladdii TFG-da ayaa shaaca ka qaaday inay dib ugu soo laaban doonaan Magaalada B/weyn, kadib wada hadalo dhex maray Saraakiishii Maamulkaas iyo Mas’uuliyiinta Maxkamadaha Islaamka Gobolka Hiiraan ee Dowladda taageersan.

Aadan Cabdi Ciise (Aadan Garaaso) oo ahaa Gudoomiyihii Degmada B/weyn ayaa isagoo ku sugan Deegaanka Kala Beyrka ayaa waxaa uu sheegay in dhowaan ay si nabad ku imaan doonaan Magaalada B/weyn.

Waxaa uu sheegay in soo laabashadooda ay ka dambeysay kadib markii ay wada hadal la galeen Dowladda, waxaana uu carabka ku adkeeyay in ay la shaqeyn doonaan Maamulka Maxaakimta ee Gobolka ka jira.

Mar wax laga weydiiyay sida ay suurta gal ku noqon karto in Labo Maamul uu Gobolka ka howl gala, ayuu taasi sheegay in iyagu aanay u socon xil, balse ay yihiin dadkii gobolka u dhashay, isla markaana ay doonayaan inay la shaqeeyaan Maamulka.

Aadan Garaase ayaa cadeeyay in aanay wadan wax Ciidan Ethiopian ah, isagoona meesha ka saaray in aan qorshaha ku jirin in Ciidamo Ethiopian ay soo galaan Gobolka, waxaase uu ku nuux nuuxsaday in intii ay joogeen xuduuda Ethiopia ay iska go’aansadeen inay dib gobolka uga soo laabtaan.

Mar uu ka hadlay cida kula wehlisa soo noqoshadooda Gobolka ayaa waxaa uu ka tilmaamay Gudoomiyihii hore ee Gobolka Hiiraan Yuusuf Dabageed iyo saraakiil kale.

Si kastaba ha ahaatee dib u soo laabashada Maamulkii hore ee Gobolka Hiiraan oo dagaalo adag oo ay la galeen Kooxaha Dowladda ka soo horjeeda, taasoo keentay in Gobolka laga saaro.

Baarlamaanka Soomaaliya oo maalmaha soo socda dib u bilaabaya kulamadiisii

May 29, 2009

Baarlamaanka Soomaaliya ayaa lagu wadaa in uu maalmaha soo socda dib u bilaabo kulamadiisii caadiga ahaa kadib dhowr todobaad oo aysan wax shir ah yeelan mudanayasha Baarlamaanka.

Guddoomiye ku xigeenka labaad ee Baarlamaanka Soomaaliya Cusmaan Cilmi Boqorre ayaa sheegay in sababta ay kulamada u qabsoomi waayeen ay ahayd iyadoo ay qaar ka mid ah mudanayaasha baarlamaanka dalka dibaddiisa ku maqnaayeen, wuxuuna caddeeyay in ay haatan xildhibaannadaas soo noqdeen ayna dib u bilaaban doonaan kulamadii Baarlamaanka.

Cusmaan Cilmi Boqorre waxaa uu sheegay in ay jiraan howlo badan oo horyaalla Baarlamaanka Soomaaliya, kuwaasi oo mudanayaasha guda geli doonaan marka ay kulankooda ugu horreeya isugu yimaadaan.

Guddoomiye ku xigeenka Baarlamaanka Soomaaliya waxaa uu sheegay in aysan waxba ka jirin warar sheegayay in ay kulamadii Baarlamaanka hakad u galeen sabab la xiriirta madaafiic dhawaan lagu weeraray xarunta Baarlamaanka, wuxuuna sheegay in maalmaha soo socda la ogaan doono in ay arrintaas darteed u baaqdeen kulamadii baarlamaanka.

Kulankii ugu dambeeyay ee ay yeeshaan Mudanayaasha Baarlamaanka Soomaaliya ayaa waxaa madaafiic lagu weeraray Xarunta KMG ah ee Baarlamaanka oo ah Xaruntii Gaadiidka Booliska, iyadoo madaafiicdaasna ay xaafado u dhow Xarunta Baarlamaanka ay dad rayid ah dhimasho iyo dhaawac ugu geysteen.

War Deg Deg ah: Qarax ay dad ku dhaawacmeen oo xalay ka dhacay Magaalada Kismaayo iyo Bandow lagu soo rogay

May 29, 2009

Kismaayo: Qarax ay dad ku dhaawacmeen ayaa xalay fiidkii ka dhacay gudaha Magaalada Kismaayo ee Xarunta Gobolka Jubada Hoose, iyadoona qaraxa kadib ay Ciidamada Ammaanka ku soo rogeen Magaalada Bandow.
Wararka ayaa sheegaya in qaraxa oo ahaa Bam nuuca gacanta laga tuuro, ay ku dhaawacmeen ilaa labo ruux, waxaana halka lagu tuuray Bamka la sheegay inay aheyd goob ay dadka ku badan yihiin.

Ciidamada Ammaanka Magaalada Kismaayo ayaa durba markii qaraxu dhacay bilaabay howl gal, iyagoona dadka ku wargelinayay inay Magaalada tahay bandow, waxaana jirin cid loo soo qabtay qaraxa.

Lama oga cida ka dambeysa qaraxa iyo dadka lala eegtay cida ay ahaayeen, waxaana qaraxan uu ahaa mid si weyn u gil gilay Magaalada, isla markaana laga dareemay qal qal dhinaca ammaanka ah.

Tan iyo markii bishii 8aad ee sanadkii hore ay la wareegeen Magaalada Kismaayo Xoogag Islaamiyiin ah ayaa waxaa magaalada ammaankeeda ahaa mid buuxa, iyadoona dadka ku dhaqan halkaas iyo deegaanada ku dhow dhow ay nabad ku naaloonayeen wixii ka dambeeyay mudadaas oo Maamul Islaami ah uu ka howl galayay.

Dowladda KMG ah ee Soomaaliya ayaa ku goodisay in maalmaha soo socda ay qaadin doonto weeraro ka dhan ah Kooxaha Mucaaradka

May 29, 2009

Muqdisho: Wasiirka Qorsheynta iyo Iskaashiga Caalamiga C/raxmaan C/shakuur Warsame oo Warbaahinta la hadlay ayaa sheegay in Dowladda ay qorsheysatay inay weerarto saldhigyada Kooxaha Mucaaradka.
Mr Warsame ayaa ku eedeeyay Kooxaha Mucaaradka ku ah Dowladda KMG inay diideen wanaag iyo wad hadalba, waxaana uu tilmaamay in Culimadii, Odayaashii, iyo Caalamka ay war ka diideen, sidaas darteedna ay Dowladda qaadi doonto weeraro ka dhan ah sida uu hadalka u dhigay.

Waxaa uu sheegay in aanu isagu hada ka hor dhaceyn weerarada ay Dowladda qaadeyso, hase ahaatee waxaa uu sheegay in arrintaas ay u taalo Hey’adaha Amaanka, waxaase uu qiray in Dowladda ay tir tiri doonto Mucaaradka ka soo horjeeda.

“Dowladda waxaa u qorsheysan inay qaado Howl galo ka dhan ah kuwa nabadiidka shareeco diidka ah”ayuu yiri C/raxmaan C/shakuur oo ka gaabsaday inuu daaha ka rogo goorta ay howl galadaas dhici doonaan, isagoo ku macneeyay arrin sir ah oo u taalo Hey’adaha Ammaanka Dowladda.

Maalmihii u dambeeyay ayaa Saraakiisha Ciidamada iyo Mas’uuliyiinta Dowladda waxaa u socday kulamo qarsoodi ah, kaas oo ay ku dajinayeen istiraatiijiyad dagaal oo lagu sheegay mid ay Dowladda u qaadeyso inay ku soo ceshato goobaha ay gacanta ugu jirto Mucaaradka.

Kooxaha Mucaaradka oo hada gacanta ku haaya inta badan Caasimada, ayaa wax ka yar 3km u jira Madaxtooyada Villa Somalia ee looga arrimiyo Dowladda, halkaasoo uu degan yahay Madaxweynaha Soomaaliya Shariif Sheekh Axmed, waxaana wali Ciidamada Dowladda iyo Kooxaha Mucaaradka isku hor fadhiyaan qeybo ka mid ah Wadada Wadnaha ee Magaalada Muqdisho.

Ciidamada Xisbada xoogaga Al-shabaab oo xalay gacanta ku dhigay nin gudaha magaalada qori ku dhaxsitay.

May 29, 2009

Baydhabo: Markii ugu horeysay tan iyo intii gudaha magaalada baydhabo ee xarunta gobalka Bay ay soo gaareen xoogaga Al-shabaab ayaa waxaa ay xalay gudaha magaalada ay ka qabteen nin ciidamada aan ka tirsaneyn oo magaalada qori ku dhaxsitey.
Xili ciidamada xisbada magaalada baydhabo ay howlgalo ay ka wadeen qeybo ma kid ah gudaha magaalada ayaa waxaa ay ninkani soo qabteen isagoo qorigii sita waxaana xiligaasi laga soo bixyey guri uu ku jirey.

Taliyaha ciidamada Al-shabaab ee Bay iyo Bakool Sheekh xasan deerow oo dhacdadaasi weriyaasha uga warbixinayey ayaa waxaa uu sheegay ninkani markii ciidamadu ay u tageen uu kusoo furay rasaas xoogan ,ayadoona markii danbe u suurta gashay ciidamada in ay gacanta ku dhigaan ninkaasi.

Waxaana taliyaha intaasi uu ku daray in aaney jirin cid wax ku noqotay rasaasta uu furay ninka lasoo qabtay,waxaana sidoo kale laga qaadey qorigii uu sitay oo ahaa qoriga jii tirii{G3} sida sarkaalkani uu sheegay.

Hase yeeshee skeekh xasan deero ayaa xaqiijiyey in xabsiga degmada baydho ay ku xireen ninkaasi dhawaan uu sheegay in maxkamad ay soo taagi noonaan.

Sikastaba ha ahaatee dhacdadani ayaa waxaa ay kusoo beegmaysaa xili qeybo kamid ah gudaha magaalada baydhabo ciidamada Al-shabaab ay ka wadaan howlgalo amaanka lagu xaqiijinayo.


Follow

Get every new post delivered to your Inbox.

Join 51 other followers