Wasaaradda Warfaafinta Soomaaliya oo maanta si rasmi ah u furtay website laga booqan karo wararka ka baxa Idaacadda Radio Muqdisho

Daahir Maxamuud Geelle Wasiirka warfaafinta Soomaaliya ayaa sheegay inay maanta hawada ay gelisay wasaaraddiisu website laga dheehan karo wararka ka baxa idaacadda Raadiyo Muqdisho.

Bartan Internet oo lagu magacaabo www.raidomuqdisho.net ayaa wuxuu wasiirku sheegay inay ugu talogaleen in dadka wax aqriya ay kala socdaan wararka ka baxa idaacadda Dowladda.

“Markii howshan naloo xilsaaray waxaan ku gudo jirnay hirgelin warbaahin ku hadasha Afka Dowladda KMG ah , website-kana qayb ayuu ka yahay” ayuu yiri wasiirka oo la hadlayay Radio Muqdisho xili uu ku sugnaa xafiiskiisa.

Sheekh C/raxiin Ciise Caddow oo ka tirsan saraakiisha wasaaradda warfaafinta oo isaguna ka hadlay furitaanika website-kan cusub ayaa sheegay inuu yahay mid ay ugu faa’iideynayaan dadka ay dhaafaan dhageysiga wararka Idaacadda oo qoran.

“Websetkaan waxaa loogu talogalay inay ka baxaan wararka idaacada oo cod ah 18-ka saac ee ay hawada ku jirto, sidoo kale waxaa lagu soo daabici doonaa wareysiyada codadka ah ee ka baxa Idaacada” ayuu yiri C/raxiin Ciise Caddow.

Wasaarfadda Warfaafinta Dowladda KMG ah ee Soomaaliya ayaa tan iyo markii wasaaradaasi xilka Wasiirnimada qabtay Daahir Maxamuud Geelle, waxay la soo baxday howlo dheeraad ah iyo waxqabad muuqdaoo shacabka aad u soo dhaweeyay.

Taliyaha ciidamada AMISOM oo sheegay inuu xiriir ka dhexeeyo kooxaha Soomaaliya iyo Ururka Al-Qaacida

Major General Nathan Mugisha Taliyaha ciidamada AMISOM ee ku sugan magaalada Muqdisho ayaa wareysi uu siiyay wakaaladda wararka ee AFP ku sheegay inuu jiro xiriir ka dhexeeya kooxaha Islaamiyiinta ah ee dagaalka kula jira Dowladda KMG ah iyo Ururka Al-Qaacida.

“Kooxo ka socda ururka Al-Qaacida inay ku sugan yihiin Muqdisho ayaan malaynayaa, kuwaasoo dagaalka ka qeyb qaadanaaya” ayuu yiri Gen. Mugisha oo sheegay inuu rumeysan yahay in kuwaas ay yihiin kuwo amarka ugu sarreeya leh.

Taliyaha AMISOM mar la weydiiyay halka ay dagaalyahannadaas shisheeyaha ah kasoo galeen Soomaaliya ayuu sheegay inay joogaan, islamarkaana uu horay u sheegay Madaxweyanha Soomaaliya Sheekh Shariif Sheekh Axmed inay tiro dagaalyahanno ah ku sugan yihiin Soomaaliya.
Taliyuhu wuxuu sheegay in ciidamada hadda ku sugan Somalia ay isku filan yihiin, balse ay u baahan yihiin ciidamo dheeraad ah, si howshooda ay u ballaariyaan, wuxuuna sheegay in la gaarsiiyo tiradooda 8,000 ee horay loo ballanqaaday.

“Haddi weerarro nalagu soo qaado Waan iska difaacnaa, inta badanna waxaan tilmaasannaa goobo cayiman oo u muuqda kuwii nagala soo weeraray” ayuu yiri Maj-Gen. Mugisha oo ka jawaabayay inay xilliyada dagaallada duqeeyaan goobaha ay shacabku ku badan yihiin.

Maj-Gen. Mugisha, wuxuu sheegay in dalka Soomaaliya ay u joogaan sidii ay u taageeri lahaayeen dowladda Soomaaliya, balse aanu jirin qorshe intaas ka duwan oo ay wataan, isagoo sheegay in ciidamadoodu ay sugayaa inta ay hubka dhigayaan Al-shabaab ayna la midoobayaan walaalahooda Soomaalida ah.

War Deg Deg ah: Axmed Islam oo hadda Kenya lagu arkay ka dib markii uu ka soo cararay AL-Shabaab

Axmed Islaam ama Axmed Madoobe ayaa saakay waxaa uu si nabada ku dhexmarayay magaalada Gaarisa isagoo aan hubeysneyn, waxaana magaaladan oo ay dagan yihiin Soomaalida Kenya kana tirsan dalkaas lagu waramayaa iyana in amaanka magaaladaasi si weyn loo adkeeyay iyadoo laga cabsi qabo in ay ururka Al-shabab ay ka soo talaabaan xadka Kenya.

Axmed Madoobe kolkuu soo gaarayay magaaladan ayaa waxaa la socday sida aanu wararka ku heleyno rag kale oo masuuliyiina kana mida ururka Xisbul Islaam oo uu ka mid yahay Xasan Mahdi oo laba bilood ku xayirnaa Juboyinka kadib markii uu halkaasi iyaga shabaab uu ku qabsaday taas oo keentay markii dambe in wadadii uu mari lahaa ay godo.

Dhinaca kale waxaa lagu soo waramayaa meel aan sidaa uga fogeyn Gaarisa in ay gaaf wareegayaan ciidamada Al-shabab kuwaas oo aan weli la aqoon go’aanka ay qaadan doonaan iyo in ay halkaasi ku ekaan doonan.

War Deg Deg ah: Ciidanka DFKM oo soo degay xaafadaha Tawakal, Tusbaxle, Buulo Mugdi iyo Raadaarka ee Degmada Dayniile

Muqdisho:Ciidamo ka tirsan DFKM ayaa waxaa ay xalay soo dageen sida ay Halgan.net u xaqiijiyeen dad joobjoogayaal ah qeybo ka mid ah xaafada Dayniile waxaana ka mid ah meelaha ay dageen xaafadaha Tawakal, Tusbaxle, Buulo Mugdi iyo Raadaarka.

Dad weynaha ku dhaqan xaafadaaas ayaa waxaa la soo gudboonaatay cabsi iyo walwal hor leh iyagoo ka baqay in xaafada uu dagaal ku dhexmaro xoogagga Al-shabaab oo horay u joogay xaafada Dayniile haddana inta badan u baqoolay magaalada Kismaayo in marka ay soo laabtaan ay dagaal ku qaadaan Xaafada Dayniile.

Ciidanka DFKM ayaa waxaa ay ka samaysteen xaafadaha ay dageen dhufeysyo iyo difaac si ay iskaga difaacaan weerar kaga yimaada xoogagga dagaalka kula jira oo iyagu saacad kasta uu dagaal ka dhex qarxi katro.

Saraakiisha Ciidanka DFKM ayaa waxaa ay dadaal ugu jiraan in ay weeraro ku qaadaan goobaha ay Muqdisho kaga sugan yihiin xoogagga Xizbul Islaam oo hadda iyagu difaac ku jira halka markii hore ay iyagu weeraro qaadi jireen.

Ciidanka DFKM ayaa waxaa loo soo tawabarey ciidamo aan la qoon ilaa haatan inta ay le,g yihiin lana oga sida ay isaga difaaci karaan weerarada kooxaha ka soo horjeeda DFKM.

Sh Xasan Turki oo la filayo in uu ku dhawaaqo ka bixida Xisbul islaam kadib Culeys kaga yimid Al-Shabaab

Sh Xasan Turki oo Shabaabku shalay ku qabteen Degmada Dhoobley ayaa la filayaa in uu ku dhawaaqo ka bixida Xisbul islaam kadib markii culeys kaga yimid Horjoogayaasha Al-Shabaab.

Kadib markii Shabaabku ku guuleysteen la wareegida Gobolada Jubooyinka oo ay kala cayriyeen Madaxdii Xisbul islaam ayey u suurta gashay in ay Sh Xasan Turki xoog ku ogoleysiiyaan ka bari noqoshada kooxda ay Shabaabku ku tilmaameen rag soo xirtay Shaati islaam.

Sh Xasan Turki oo horay uga biyo diiday Maamulka Kismaayo ee Al-Shabaab ayey laba arrin ku qasbeysaa in uu u hogaansamo awaamirta Al-Shabaab oo mar kale uusan mucaaradin Maamulka Al-Shabaab.
Tan koowaad Sh Xasan Turki ayaan iska dhiibi karin Kenya sida saaxiibadiisa xisbul islaam sameeyeen maadaama uu dambiile ka qoran yahay xaga Kenya iyo Wadamada Reer Galbeedka.

Tan labaad Seekha oo ay isku raacday xanuun iyo da’ oo aan ka bixi karin jabhadeyn iyo duur gal kale haatana u muuqda oday wad suge ah.

Horjoogayaasha Al-Shabaab ayaa saxaafada ka wada marin habaabin ku aadan qaabka ay ula dhaqmeen Sh Turki ayagoo sheegay in wadaadku yahay Aabaha Mujaahidiinta oo ay ixtiraam weyn u hayaan kuna soo booqdeen gurigiisa kadib markii ay casumaad ka heleen sheekha.

Sida la ogyahay Shabaabku ma qiimeeyaan cid aan ayaga ka tirsaneyn oo aan 100% u hogaansaneyn, waxaana la ogyahay in Shababaku ku gacan seyray Culumo iyo waxgarad soomaaliyeed idilkood sidaas darteedna aan la sugeyn in ay qiimeeyaan Oday ka tirsan Xisbul islaam oo ragii kale ay meesha uga carareen.
Laakin Sh Xasan Turki ayey ka dhiganayaan balaq ay ku soo dabaan Maleeshiyaadka kala firdhaday ee Xisbul islaam iyo shaki lagu kala abuurayo Horjoogayaasha Kenya u baxsaday iyo Sh Xasan Turki si Shabaabku ugu guuleystaan kala furfurida haraaga Xisbul islaam ee ku sugan Gobolada kale.

Golaha Wasiirada oo cod fartaag ah ku doortay gudoomiyaha maxkamada sare

Golaha Wasiirada Soomaaliya ayaa cod aqlabiyad leh ku ogolaaday Mahmoud Omar Farah(Indhobuur) in uu noqdo gudoomiyaha maxkamada sare ee dowlada KMG Somalia kadib ku dhawaad laba sano oo uu booskaasi banaanaa.

Mar Indhabuur oo horay usoo noqday xeer ilaaliyaha qaranka oo uu kasoo noqday dowladii Milatariga iyo wasiirka cadaalada oo uu kasoo noqday dowladii madaxweynihi hore Dr C/qasim ayaa markakan kusoo baxay jagada gudoomiyaha maxkamada sare oo ah jago culus.

Kadib kulan ay maanta isugu yimaadeen madaxtooyada Somalia Golaha Wasiirada ayaa waxaa loogaga dooday magacaabista Gudoomiyaha Maxkamada Sare waxaana aaqirkii ay cod far taag ah ku ogolaadeen dhamaan xubnaha golaha wasiirada mas’uulkan cusub ee hogaanka u qaban doono Maxkamada sare.

Afhayeenka Xukumada Cabdi Xaaji Goobdoon oo la hadlay warbaahinta ayaa sheegay in Maxamuud Indhabuur uu aqbalay xilka isaga oo intaasi raaciyey in ra’isulwasaaraha uu ugu baaqay in uu howshiisa kasoo baxo.

Sidoo kale kulanka golaha wasiirada ayaa waxaa logaga dooday qodobo ay ka mid ahaayeen habraac lagu sameyn doono dastuur cusub oo ay yeelan doonto dowlada KMG Soomaaliya,iyo sidoo kale sharci ay soo gudbiyeen AMISOM oo ku saabsan difaaca dowlada KMG ah.

Wasiirka Dastuurka iyo Arrimaha Federaalka Madoobe Nuunow Maxamed oo la hadlay warbaahinta kulanka kadib ayaa sheegay in qodobka ku saabsan dastuurka cusub oo ah qodob ay soo gudbiyeen wasiiro uu isagu ku jiray uu yahay qodob muhiim ah,wuxuu kaloo sheegay in dastuurka cusub uu siin doono shacabka dhamaan wixii awood ah.

Booska gudoomiyaha maxkamada sare ayaa waxaa ku fadhiyey Yusuf Cali Haariin laakin waxaa xilka ka qaaday madaxweynihi hore C/llahi Yusuf iyadoo xil ka qaadisti lagu sameeyey Mr Haaruun ay keentay qilaaf xiligaasi soo kala dhexgalay C/llahi Yusuf iyo ra’isulwasaarihiisii Cali Maxamed Geedi.

War Deg Deg ah: Saraakiil ka tirsan Xisbul Islaam oo xuduuda Kenya ka tallaabay

Saraakiil ka tirsan Ururka Xisbul Islaam ayaa ka tallaabay xuduuda Kenya, kadib markii looga itaal roonaaday Gobolada Jubooyinka, waxaana qaar ka mid ah saraakiishaas lagu arkay Gobolka Waqooyi bari Kenya ee ay Soomaalidu degto.

Ilo wareedyo lagu kalsoon yahay ayaa sheegaya in Saraakiil uu horkacayo Sheekh Ismaaciil Xaaji Caddow, Xasan Mahdi, Ibraahim Shukri Abuu Zeynab ayaa la sheegay in ay xuduuda Kenya ka tallaabeen.

Wararka ayaa sheegaya in Saraakiishan ay ka galbiyeen xuduuda, Niman Muqalasiin ah, waxaana ay ka soo baxsadeen Degmada Dhoobley oo shalay galab la wareegeen Xarakada Alshabaab.

Axmed Madoobe oo ahaa Sarkaal ka tirsan Xisbul Islaam ayaa isaga iyo maleeshiyaadkiisa la ogeyn halka jaan iyo cirib dhigeen, waxaase la sheegayaa in dhanka Howdka Raaskambooni ay u kicitimeen.

Xoogaga ka tirsan Alshabaab ayaa si weyn difaacyo iyo dufeysyo uga qotay markii ay galeen Degmada Dhoobley oo ku taal Xuduuda, waxaana dadka caanka ka ah degmadaas ay u carareen dhinaca Kenya.
Ururka Xisbul Islaam ayaa si rasmi loogaga itaal roonaaday deegaanada Jubooyinka oo intii fara ku tiriska aheyd ee ay ka ariminayeen lagala wareegay, taasoo u dambeysay Dhoobley.

Xisbiga oo wali naf la caari la ah duulaanada qaawan ee Shabaab ayaa wuxuu u sii xuubsiibanayaa bur bur deg deg ah, waxaana shaki la gelinayaa Mustaqbalka qeybta kale ee Xisbul Islaamka ku sugan Koofurta iyo Bartamaha Soomaaliya.

Kenya oo wixii ciidan ay laheyd banaanka soo dhigatay kadib qabsashadii Shabaab ee Dhoobley

Dowlada Kenya ayaa kordhisay ciidamadeeda jooga xadka ay la wadaagto Soomaaliya maalin kadib markii ay Xarakada Al-Shabab ay la wareegeen magaalada Dhoobley oo u dhow xadka Kenya.

Saraakiisha Amaanka dalka Kenya ayaa tilmaamay in ay adkeeyeen amaanka xuduuda si bay yiraahdeen loogaga hortago kooxaha Islaamiyiinta Soomaaliya oo ku sii siqaya xadka Kenya ay la wadaagto Soomaaliya,waxa kale oo ay sheegeen in ay adkeeyeen amaanka magaalooyinka ku yaala gobolka waqooyi Bari.

“Xuduuda gabi ahaanba waa la xiray laakin dadka wali waxay isku dayayaan in ay galaan si ay isaga diiwaan geliyaan xerooyinka qaxootiga ee ku yaala Kenya”sidaa waxaa sarkaal ka tirsan hey’adaha gargaarka oo jooga magaalada Dhoobley kaasoo u waramay wakaalada wararka ee Rueters.

Arrintan ayaa ka danbeysay kadib markii shalay ay qabsadeen Al-Sshabaab magaalada Dhoobley ee gobolka J/hoose maalmo yar kadib marki ay isaga baxeen Xizbul Islaam.

Dowladda Kenya ayaa sheegtay in ay ka hortageyso fal kasta oo lagu carqaladeynayo ammaanka iyo jirtaankeeda, waxaana ay cadeysay in aanay gacmaha ka laaban doonin daan daansiga Al-Shabab.

Saraakiil ka tirsan Xarakada Al-Shabab oo Dhoobley kula kulmay Xasan Turki

Saraakiil ka tirsan Xarakada Al-Shabab ayaa shalay kula kulmay duleedka Degmada Dhoobley Sheekh Xasan Turki oo ka mid ah saraakiisha sar sare ee Xizbul Islam, hase yeeshee haatan xaalad caafimaad daro iyo da’ isugu darsoontay.

Kulankan oo ahaa mid albaabada uu u xirnaa ayay wararku sheegayaan in Saraakiil ka tirsan Al-Shabab ay ku booqdeen Duleedka Dhoobley Xasan Turki oo mudooyinkii u dambeeyay xanuuno kala duwan la taahayay.

Sida ay sheegayaan wararka kulankan oo saacado badan qaatay ayaa la ogeyn ilaa iyo hada waxyaabaha looga wada hadlay, hase yeeshee kulanka ayaa u ekaa mid diirada lagu saarayay xaalada jubooyinka iyo in Shabaab Xasan Turki u arkin cadaw.
Xasan Turki oo ay ku tilmaamaan Shabaab aabayaasha Jihaadka ayaa waxaa uu dhowaan ku gacan seyray in uu garab siiyo Maleeshiyaadka Axmed Madoobe ee laga soo eryaday Kismaayo, ilaa ugu dambeyntii lagu shubay Kenya.

Wararka qaar ayaa sheegaya in saraakiil sar sare oo aan magacyadooda la xusin ay u tageen Xasan Turki, kuwaasoo isla meel dhigay arrimo badan oo muhiim ah.

Sheekh Xasan Turki oo ku magacaaban Gudoomiye Kuxigeenka Xisbul Islaam ayaa si dhab loo ogaan karin inuu Xisbiga ka baxay iyo in kale, inkastoo mowqifkiisa yahay sidii lala dagaalami lahaa Ciidamada Shisheeye.

Amiirka Xarrakada Al-Shabaab oo cajalad maqal ah kagana hadlay dagaallada ay ku jiraan ee ka socda Soomaaliya

Amiirka Xarrakatul-shabaab ayaa cajalad maqal ah oo uu soo diray ku sheegay in dagaallada ay kala horjeedaan DFKMG ah iyo AMISOM ay sii wadi doonaan, inta ay ka gaarayaan inay dalka ka saarayaan ciidamada AMISOM.

Cajalada ayuu ku sheegay in shacabka Soomaaliyeed uu u dirayo hambalyo ku aaddan maalinta ciiddul Adxa, isagoo sheegay in dadka looga baahan yahay inay taageeraan jihaadka socda oo uu sheegay in ugu dambeyn guulo laga gaari doono.

“Dagaallada waan wadaynaa inta aan dalka ka saarayno ciidamada AMISOM isla markaana aan xukunka ka tuurayno dowladda dalka keentay ciidamadaas” ayuu yiri Sheekh Mukhtaar C/raxmaan Abuu-Subeyr.

Mas’uulkan wuxuu sheegay in dagaalladooda ay u kaashan doonaan cid walba oo doonaysa in dalkan lagu dhaqo diinta Islaamka, dadkuna ay ku diirsadaan Islaamka, isagoo sheegay in ciiddan ciiddeeda kale la ciidayo iyadoo dalka lagu maamulayo Islaamka.

“Waxaan dagaalladeenna ku joojin karnaa haddii ay AMISOM dalka isaga baxdo, inta ay dalka joogaanna dagaallada waan sii wadaynaa” ayuu yiri Sheekh Abuu-Subeyr oo ah amiirka guud ee Xarrakatul shabaab.

Ma uusan soo hadal qaadin dagaallada kala dhexeeya ururka Xisbul Islaam oo weli ka socda deegaanno ka tirsan Gobolka Jubbada Hoose, waxaana cajaladda maqalka ah oo saxaafadda loo qaybiyay ayaa waxaa ku jiray gabayo lagu cabirayo xaaladda dalka uu marayo.