Archive for the ‘Uncategorized’ Category

Rajadii ay qabtay DFS oo soo idlaatay kadib go’aan kasoo baxay maamulka…

October 21, 2014

WAAJIDPRESS – 21 Oct 2014:

Iyadoo Ra’iisal Wasaaraha Somaliya Dr. C/weli Sheekh Axmed Maxamed uu booqasho ku jooggo Magaalada Nairobi ee Xarunta Kenya, ayaa waxaa soo baxaaya warar sheegaaya in Kenya uu kala hadlaayo arrinta Badda Somaliya.

Ra’iisal Wasaaraha, ayaa casuumaad uu ku kili yahay waxa uu ka helay Dowladda Uhuru Kenyatta, mudadii uu booqashada ku joogay Magaalada Bujumbura ee Xarunta Burundi, iyadoo uu halkaa maalmo ka hor kaga tallaabay Nairobi.

Sarkaal ka tirsan Madaxtooyada Somaliya, ayaa sheegay in lagu soo baraarugay booqashada uu Ra’iisal Wasaaruhu ku tagey Magaalada Nairobi, isla-markaana uu iska soo reebay xubno Wasiiro ahaa, oo ku kaabaayay socdaalkiisii Bujumbura.

Madaxtooyadu waxay kaloo ogaatay in Ra’iisal Wasaaraha ay la socdaan xubno ku dhow dhow, oo laga tilmaami karo, sida Xogheynada iyo ilaaladiisa gaarka ah, kuwaa oo markii horeba ka raacay Magaalada Muqdisho, Talaadadii hore.

Ra’iisal Wasaaraha, ayaa kulamo gaar gaar ah Magaalada Nairobi kula qaadanaaya Masuuliyiinta Dowadda Kenya, iyadoona ay soo baxayaan warar sheegaaya in Kenya ay balanqaaday inay ka qafiifin doonto, mowjadaha siyaasadeed ee ku furan, haddii uu yoolkeedu taageero.

Kenya, ayaa waxay ka dheregsan tahay in Ra’iisal Wasaare C/weli Sheekh Axmed uu culeys xoogan ka heysto Madaxweynaha Somaliya, Baarlamaanka iyo beelaha qaarkood, xilli ay u cuntami weyday doorkiisa hogaamineed.

Sidoo kale Kenya, ayaa waxay dareensan tahay in dhaqaali yari ay heysato Xukuumadiisa, isla-markaana waxaa la sheegay inay dooneyso inay kaga faa’iideysato foosha heysata, ayna suurta gal tahay inay ka saxiixdo xadeynta Badda Somaliya. Taa oo Kenya u sahli kareysa inay la wareegto qayb ka mid ah Xeebihii Soomaaliya, haddii uu taageero Baarlamaanka hadda jiraa.

Laakiin Xildhibaanada Baarlamaanka Somaliya oo intoodu badan saluugsan heshiiska lagu kala qaybinaayo Gobolka Mudug, ayaa waxay u biro tumanayaan Wasiirka 1-aad ee Xukuumada, iyadoona ay suurta gal tahay in mooshin ka soo diyaariyaan. Waxaana xusid mudan in Xildhibaanada qaarkood ay ka caroodeen heshiiskii ay Xukuumadiisu la gashay shirkadda laga lee yahay Turkiga, sidoo kalana aanu Baarlamaanka hor imaan, tan iyo bishii September oo mar looga yeeray.

Heshiisyo badan oo Xukuumadu la gashay dhinacyo kala duwan, ayaan weli la horkeenin Baarlamaanka Somaliya, haddiiba ay dhacdo in Ra’iisal Wasaaruhu uu heshiis qarsoodi ah la galo Kenya, ayaan looga fadhin inuu horkeeno Baarlamaanka. Waxayse weydiintu tahay heshiiskii miis madow lagu kala saxiixdaa, meeshii looga dhaqmi lahaa.

Ra’iisal Wasaarihii hore ee Somaliya Dr. Cumar C/rashiid Cali Sharmarke, ayaa horey heshiis ku aadan Badda Somaliya ula galay Dowladdii Mwai Kibaki (Kenya), ha yeeshee ay socon weyday, ka gadaal markii Baarlamaankii Kmg ahaa uu laalay in gorgortan laga galo Xuduudaha Badda ee Somaliya.

Tani waxay ku soo aadeysaa, xilli Madaxweynaha Somaliya Xasan Sheekh Maxamuud uu laba bilood ka hor, uu Maxkamada Dembiyada Caalamiga ah (ICC), uu u gudbiyay cabasho ka dhan ah qorshaha Kenya ku dooneyso inay kula wareegto kheyraadka Somaliya.

Daawo Bananbixii Shaley Ka Dhacay Magalada baydhaba ee Looga Soo Horjeedey Kooxda Aragtida gaaban ee Shirka u Fadhiya Magalada Baydhaba

October 20, 2014

WAAJIDPRESS – 20 OCT 2014:

Dibadbaxan oo ahaa mid loogasoohorjeeday shirka maamul usameynta sadexgobol ee haatan magaalada baydhabo ay kawadaan wasiiro kasocda xukuumada soomaaliya waxaana dibadbaxan sooqaban qaabiyey maamulka kgs lixda gobol oo uu madaxweynaha kayahay madoobe Nuunow Maxamed.

Bananbax aad u balaaran ayaa shaley waxaa uu ka dhacay magalada baydhaba bananbaxan oo looga soo horjeedo kooxaha aragtida gaaban qaba ee ka abaabulaya shirka la sheegayey in maamul lagu sameyn doono 3 gobol – Hoos ka daawo:

 

Gudoomiyaha Baarlamaanka oo maanta ogolaadey in golaha Baarlamaanka lagu bedelo Xildhibaano baneeyey boosaskoodii

October 20, 2014

WAAJIDPRESS – 20 Oct 2014:

Kulanka Baarlamaanka ee maanta oo ay soo xaadireen 168 Xildhibaan waxaa lagu dhaariyey Xildhibaanno cusub oo kala ahaa:-
Xildhibaan Maxamuud Ducaale Muuse (ka soo jeeda beesha Dhulbahante) ayaa bedelay Allaha u naxariistee Marxuumad Saado Cali Warsame.
Xildhibaan Yuusuf Maxamed Cali (ka soo jeeda beesha Dhulbahante) oo bedelay Xildhibaan Dr. Cali Khaliif Galeyr.
Xildhibaan Saciid Maxamed Maxamuud Xayd (ka soo jeeda Somaliland) oo isna bedelay Allaha u naxariistee Aabihiis General Maxamed Maxamuud Xeyd.

Gudoomiyaha Golaha Shacabka Jamhuuriyadda Federaalka Soomaaliya Mudane Prof. Maxamed Sheekh Cusmaan Jawaari oo hadal kooban ka jeediyey furitaanka kulanka Baarlamaanka waxa uu Xildhibaannada xasuusiyey muhiimadda ay leedahay in waqti adag la shaqeeyo kalfadhigan 5aad hadii aanay taasi dhicinna kulfadhiyada soo socdaayi ay adkaan doonto shaqadooda natiijaduna ay noqon karto fashil ku yimaada yoolka la hiigsanayo 2016ka hadii ay taasi dhacdana mas’uuliyadeeda ay qaadan doonaan XIldhibaannada.

Dhinaca kale Gudoomiyaha Baarlamaanka Prof. Maxamed Sheekh Cismaan Jawaari, waxa uu ka hadlay xadidaada fasaxa XIldhibaannada Kalfadhigan 5aad iyo in sida uu yahay loo fuliyo Xeer Hoosaadka Golaha Shacabka qeybaha kaga aadan ganaaxyada la xiriira ka maqnaashaha fadhiyada Baarlamaanka ayadoo XIldhibaankii fasax la’aan maqnaada Todobaad loo diri doono guddiga Anshaxa si uu u qaato digniin iyo ganaax lacageed oo gaaraya $600.

Markaasi kadib XIldhibaannada Golaha Shacabku waxa ay gudagaleen ajandayaasha waxaana ugu horeeyey dhageysiga warbixinta Guddiga Daraasaadka iyo soo diyaarinta sharciga Axsaabta siyaasadeed waxaana xog ururin iyo la tashiyo uu guddigaasi soo sameeyey Baarlamaanka ka hor akhriyey gudoomiyaha Guddigaasi Prof C/risaaq Cusmaan Jurrille.

Gudoomiyaha Baarlamaanka oo Warbixinta guddigaasi kadib ka hadlay muhiimadda ay leedahay in la helo Axsaab siyaadeed oo dalka ka sameysma sidaasi daraadeedna uu XIldhibaannada ku boorinayo inay Warbixinta guddiga Daraasaadka iyo soo diyaarinta Sharciga Axsaabta Siyaasadeed si fiican usoo eegaan deetana talooyinkooda kusoo celiyaan guddigan

War deg deg ah: Gaari Qarxa lagu soo xiray oo lagu qabtay Muqdisho.

October 20, 2014

WAAJIDPRESS – 20 Oct 2014:

Ciidamada Nabad Sugida Soomaaliya ayaa Maanta Magaalada Muqdisho ku soo bandhigay Gaari Nooha ah oo Waxyaabaha Qarxa ay ka buuxeen oo lagu qabtay Degmada Hodan ee Gobolka Banaadir.

Gaariga ayaa waxaa la soo dhigay Xaafada Tarabuunka ee Degmada Hodan,iyadoona Dadka Shacabkaa ay Ciidamada ku wargaliyeen kadib markii ay ka shakiyeen.

Afhayeenka Wasaarada Amiga Qaranka Xukumadda Soomaaliya Maxamed Yuusuf Cismaan oo la hadlay Warbaahinta ayaa sheegay in Gaariga ay Saarnaayeen Miinooyin,Bambooyin iyo Labo Qori oo AK-47 ah.

Maxamed Yuusuf Cismaan ayaa sheegay in Gaarigaan ay Al-shabaab doonayeen in ay Dhibaato ku geeystaan oo ay Dadka Shacabkaa ku halaagaan sida uu tilmaamay.

Magaalada Muqdisho ayaa waxaa ka dhacay Habeynadii la soo dhaafay Qaraxyo loo adeegsaday Gaadiid laga soo buuxiyay Qaraxyo oo la soo dhigay Goobo Dad Shacab ah ay ku sugnaayeen.

War culus: Ilka Xanaf Iyo Wasiir Faarax Oo Isku Dhegan.

October 20, 2014

WAAJIDPRESS – 19 Oct 2014:

Gudoomiyaha Maxkamada sare Ceydiid C/llaahi Ilka-xanaf ayaa ka soo horjeestay shirkii dhowaan lagu soo gaba gabeeyay magaalada Muqdisho ee looga hadlayay arrimaha Garsoorka, isagoo ku tilmaamay dad aan garsoorka ku lug laheyn in shirkaas la isugu yeeray.

Shir jaraa’id uu ku qabtay magaalada Muqdisho Gudoomiyaha Maxkamada sare ayaa waxaa uu sheegay in ujeedada shirkaas laga lahaa uu ahaa in Garsoorka lagu hoos geeyo Wasaarada Cadaalada, isla markaana Hey’adaha dowladda iyo Garsoorka ay kala madax banaan yihiin.

“Shirarka badan ee magaalada lagu qabanayo ee dad badan la isugu keenayo ee looga hadlayo garsoorka, waa shir aan sharci aheyn, dadka la isugu keenayanaya garsoorka lug kuma la, waxaa u aragnaa baroorta ceesaanta ka weyn, ujeedada laga leeyahay waa in Garsoorka la hoos geeyo wasaarada cadaalada, wax soconaya oo suura galayana ma ahan”ayuu yiri Avv Ceydiid Ilka-xanaf.

Gudoomiyaha Maxkamadda Sare Ceydiid Ilka-xanaf ayaa sheegay in muddoyinkan ay soo badatay in hoteello la isugu geeyo dad aan ehel u aheyn nidaamka caddaalada Soomaaliya oo ay ka hadlaan Garsoorka, waxaana uu ku tilmaamay in dowladnimadu aaney ku socon karin hab NGO oo kale ah.

Kullamo u dhexeeya Nicklos Kay iyo madaxda Maamulada Gobolada dhexe oo muqdisho ka socda

October 20, 2014

WAAJIDPRESS – 20 Oct 2014:

Wararka naga soo gaaraya Xafiiska Wakiilka gaarka ah ee QM u qaabilsan Somaaliya Nicklos Kay, ayaa sheegaya in wakiilka uu kulamo is dabajoog ah la qaadanaayo Madaxda Maamulada Gobolada dhexe ee xiligaani badi ku sugan Magaalada Muqdisho.

Kulamada ayaa la sheegayaa inuu yahay mid salka ku haya hanaanka Maamulka loo sameynayo Gobolak Galgaduud iyo Mudug, waxa ayna wararku tilmaamayaan in Kay ay kala hadleen in dhanka DFS laga soo dadajiyo qabsoomida munaasabada maamulka lagu yagleelaayo.

Kullanka ayaa waxaa kala hogaaminaaya Madaxweynaha Ximan iyo Xeeb Cabdullaahi Cali Baarleex oo maanta soo gaaray Muqdisho, iyadoona uu horay usii joogay magaalada Madaxweynaha Galmudug Cabdi Xasan Cawaale.

Sidoo kale warku waxa uu sheegayaa in labada dhinac ay kawada hadli doonaan Heshiiskii ay dhawaan gaareen Dowladda Somaaliya iyo Maamulka Puntland maadaama Madaxda Maamuladaasi ay ku gacan seeren heshiiskaasi, waxaana jira warar sheegaya in Kay uu ka biyo diidan yahay in faragalin lagu sameeyo heshiiska garoowe.

Dhanka kale, kulamadaani ayaa waxa uu imaanayaa iyadoo 14-kii Bishan ay Magaalada Garawe heshiis ku gaaray Dowladda dhexe iyo Puntiland oo mudo khilaaf uu ka dhexeeyay.

War deg deg ah: Hadda ayaa Diyaaradaha dagaalka Kenya oo duqeeyay deegaanka Kudhaa ee G. J/hoose

October 19, 2014

WAAJIDPRESS – 19 Oct 2014:

Wararka laga helayo deegaanka Kudhaa ayaa sheegaya in ay ku dhaceen dhowr gantaallo oo ay soo rideen diyaaradaha dagaalka ee Kenya.
Kudhaa ayaa la rumeysan yahay inay baro ku leeyihiin Alshabaab, saraakiisha Kenya waxaa laga soo xiganayaa inay khasaaro ba’an gaarsiiyeen alshabaab, hase yeeshee weli shabaabku ma aysan hadlin arrintaasi.

Diyaaradaha dowladda Kenya ayaa dhowr madfac ku dhuftay halkaasi waxaana la sheegay inay ka dhasheen khasaaro dhimasho iyo mid dhaawac ah, inkastoo aan si fiican weli loo xaqiijin.

Daawo:- Sawirada Banaanbax LOOGA soo HORJEEDO SHIRKA maamulka SADEXDA GOBOL EE Ka Socda Magalada Baydhabo oo Maanta Ka Dhacay Magalada Baydhaba

October 19, 2014

WAAJIDPRESS – 19 Oct 2014:

image

image

Banaanbax aad u balaaran oo looga soo horjeeday shirka maamul u sameynta sadexda gobol ayaa maanta waxaa uu ka dhacay bartamaha magaalada baydhabo halkaas oo ay iskugu soo bexeen shacabka.

Banaanbaxan ayaa waxaa soo qaban qaabiyey maamulka koonfur galbeed ee lixda gobol oo uu madaxweynaha ka yahay madoobe Nuunow Maxamed.

Dadkan dibadbaxayey ayaa waxaa ay socod dheer ku mareen wadooyinka magaalada ayadoo markaasi muujinaayey waxa ay diidan yihiin ayaa ugu danbeyn waxaa meel fagaara ah kula hadlay wasiirka arimaha gudaha Dowlad goboleedka Koonfur galbeed Ibraahim Bayow iyo hogaamiyaasha arimaha bulshada qaar ka mid ah – Hoos ka DAAWO SAWIRO kale:

image

image

image

image

image

image

image

image

image

War CUSUB: REER BALEDWEYNE AYAA SUUBIYEY BANAANBIXII UGU HOREEYEY EE LOOGA SOO HORJEEDO AMISOM

October 19, 2014

WAAJIDPRESS – 19 Oct 2014:

image

Dad farabadan oo dagan Magaalada Baladweyne ayaa isku soo baxay Wadooyinka waaweyn ee magaalada waxaa ayna dibad baxaan kaga soo horjeedeyn ciidamada Amisom ee nabad ilaalinta u jooga somaliya

Isku soo bax ayaa ka danbeyay kadib markii ay ciidamada Amisom ay dad rayid ah ku dhaawaceyn Deegaanka Ceel Jaalle ee hoos yimaada Magaalada Baladweyne ee Xarunta Gobalka hiiraan .

Waxaa Dadka Deegaanka ay sheegeyn in ay ka caroodeyn qof shicib ah oo la sheegay in ay Ciidamada Amisom ay wateen

Dadka careysan ayaa ku dhawaaqayay erayo ay ka mid yahiin “Dooni meyno in Ciidamada Amisom ay joogaan Baladweyne “

Waxaa wali ka hadlin isu soo baxaan maamulka gobalka hiiraan iyo kan magaalada Baladweyne .

Waxaana wali xiran goobihii waxbarashada iyo ganacsiga magaalada Baladweyne ee xarunta Gobalka Hiiraan.

Sarkaal ka tirsan Laanta Dembi Baarista Kenya oo lagu dilay xadka Somaliya iyo Kenya

October 18, 2014

WAAJIDPRESS – 18 Oct 2014:

Xoogaga Shabaab, ayaa waxay xalay dileen Sarkaal ka tirsan Laanta Dembi Baarista ee Booliska Kenya, waxayna ku dileen deegaanka Libooyo oo ku dhow xuduuda Somaliya ay la wadaagto Kenya.

Libooyo waxay deegaan ahaan ka tirsan tahay Magaalada Garissa ee Xarunta Gobolka Waqooyi Bari ee Kenya, isla-markaana Xoogagii Shabaabka ee weerarka geystay, ayaa la xaqiijiyay inay baxsadeen.

Sarkaalka la dilay, ayaa waxaa lagu magacaabi jiray Mohamed Siraj Adan Yarow, waxaana dilkiisu uu ka dhacay inta u dhaxeyso Masaajidka iyo hoygiisa.

Musa Yego, Taliyaha Dembi Baarista ee Gobolka Waqooyi Bari ee Kenya, ayaa wuxuu xaqiijiyay geerida Sarkaalka, iyadoo uu xusay inay dileen dabley aan heybtoodu la aqoonsan.

Xildhibaan Maxamed Daahiye Ducaale oo ka tirsan Xildhibaanada Baarlamaanka Kenya, ayaa wuxuu sheegay in laamaha ammaanka ay wadaan baaritaano la xiriira kuwii dilka geystay.

Xildhibaanka oo wareysi siiyay laanta afka Somaliga ee VOA, ayaa waxa uu tibaaxay inaan la garanayn kuwii dilka geystay, marka laga reebo in Boolisku ay u sheegeen in la wado baaritaano ku aadan.

Dhanka kale qoraal kooban oo ay soo saartay Al Shabaab, ayaa waxay ku sheegtay inay iyadu ka dambeysay dilka Sarkaalka ka tirsanaa Laanta Dembi Baarista ee Booliska Kenya.

Al Shabaab, ayaa waxaad mooddaa inay maalmahaan dambe soo noolleysay weeraradii ay ka waday qaybo ka mid ah dalka Kenya.


Follow

Get every new post delivered to your Inbox.

Join 48 other followers