WAAJIDPRESS – 31 Aug 2013:
Khudbado Xasaasi ah ayaa laga jeediyay banaanbaxii xooganaa ee maanta ka dhacay Magaalada Baydhabo ee Gobolka Bay kaas oo looga soo horjeeday dowlada Soomaaliya.
Dadkii kahadlay Waxaa kamid ahaa Malaaq Cali Shiino oo kamid ah waxgaradka Gobollada Bay iyo Bakool, ugu horeyn waxaa uu xaaraan cad ku tilmaamay heshiiskii Adis Ababa ee DF iyo Maamulka Axmed Madoobe.
Waxaa uu sheegay inay ku dhawaaqayaan saacadaha soo aadan maamul goboleed ay udhan yihiin gobollada Gedo, Bay, Bakool, Jubbada hoose iyo Jubbada dhexe.
Sidoo kale waxaa uu sheegay in tiro ahaan dadka reer Digil iyo Mirifle Soomaalida ugu badan yihiin ayna udiyaar garoobeen difaacida dhulkooda ee lixdaas gobol sida ay hadalka udhigeen.
Waxaa kale oo ay si weyn udhaliileen dowlada Soomaaliya gaar ahaan Madaxweyne Xasan Sh oo ay ku sheegeen in mar qaxooti uu ku noqday Baydhabo.
“Jalmad uu wax ku karsado ma heysan qaxooti ayuu ahaa anagaa siiney, maantana wauxuu rabaa inuu na xukumo’ayay sheegeen dadkii kahadlay banaanbaxa maanta.
Sidoo kale waxaa uu sheegay in beri Baydhabo uu ka dhici doono kulan ay kasoo qeyb galayaan beelaha Bay, Bakool Beesha Sadde iyo DIR kuwaas oo kawada hadli doona maamul udhisa Gobollada Jubbooyinka, Gedo, Shabeelaha Hoos, Bay iyo Bakool.
Malaaq Cali Shiino ayaa tilmaamay in Baydhabo ay sida ugu dhaqsiyaha badan sidoo kale ku imaan doonaan siyaasiyiinta dowlada ku jirta ee gobolladaas kasoo jeeda